დოკუმენტის სტრუქტურა
განმარტებების დათვალიერება
დაკავშირებული დოკუმენტები
დოკუმენტის მონიშვნები
პონტოს მუხის აღკვეთილის შექმნისა და მართვის შესახებ | |
---|---|
დოკუმენტის ნომერი | 4722-IIს |
დოკუმენტის მიმღები | საქართველოს პარლამენტი |
მიღების თარიღი | 30/05/2019 |
დოკუმენტის ტიპი | საქართველოს კანონი |
გამოქვეყნების წყარო, თარიღი | ვებგვერდი, 05/06/2019 |
სარეგისტრაციო კოდი | 360050000.05.001.019497 |
|
პონტოს მუხის აღკვეთილის შექმნისა და მართვის შესახებ
|
მუხლი 1. კანონის რეგულირების სფერო
1. ეს კანონი არეგულირებს ძირითად სამართლებრივ ურთიერთობებს პონტოს მუხის აღკვეთილის შექმნის, მართვის, დაცვისა და გამოყენების სფეროში. 2. პონტოს მუხის აღკვეთილისთვის მიკუთვნებული მიწის, წყლისა და სხვა ბუნებრივი რესურსების განკარგვასთან, დაცვასა და გამოყენებასთან დაკავშირებული ურთიერთობები რეგულირდება ამ კანონითა და საქართველოს სხვა საკანონმდებლო და კანონქვემდებარე სამართლებრივი აქტებით. მუხლი 2. კანონის ძირითადი მიზნები და ამოცანები 1. ამ კანონის ძირითადი მიზნებია: ა) უზრუნველყოს პონტოს მუხის აღკვეთილის შექმნა; ბ) მოაწესრიგოს პონტოს მუხის აღკვეთილის მართვის, დაცვისა და გამოყენების სამართლებრივი მექანიზმები. 2. ამ კანონის ძირითადი ამოცანებია პონტოს მუხის აღკვეთილის საზღვრებში: ა) პონტოს მუხისთვის დამახასიათებელი ბუნებრივი ეკოსისტემებისა და ლანდშაფტების, ბიოტოპებისა და მათი ცალკეული კომპონენტების, ფლორისა და ფაუნის დაცვის, აღდგენისა და ბიოლოგიური მრავალფეროვნების შენარჩუნების უზრუნველყოფა; ბ) ბუნებრივი პროცესების უწყვეტი განვითარების ხელშეწყობა; გ) მიწის, წყლისა და სხვა ბუნებრივი რესურსების დაცვის, აღდგენისა და რაციონალური გამოყენების, ეკოლოგიური განათლებისა და მეცნიერული კვლევა-ძიებისთვის ხელსაყრელი პირობების შექმნის უზრუნველყოფა; ისტორიულ-კულტურული მემკვიდრეობის დაცვა და შენარჩუნება, ბუნებრივი ბიოეკოლოგიური რეჟიმის დაცვა და მისი მონიტორინგის განხორციელება; დ) ბუნებრივ გარემოსა და ადამიანის მიერ სახეცვლილ გარემოში რეკრეაციისთვის, ტურიზმისა და სოფლის მეურნეობის მდგრადი განვითარებისთვის ხელსაყრელი პირობების შექმნის ხელშეწყობა. მუხლი 3. პონტოს მუხის აღკვეთილის შექმნა და მისი მიზნები 1. პონტოს მუხის აღკვეთილი იქმნება საქართველოს „წითელ ნუსხაში“ შეტანილი, გადაშენების საფრთხის წინაშე მყოფი მცენარის − პონტოს მუხის (Quercus pontica C. Koch.) და მასთან დაკავშირებული ეკოსისტემის შენარჩუნებისთვის საჭირო პირობების დასაცავად. 2. პონტოს მუხის აღკვეთილის შექმნის მიზნებია: ა) პონტოს მუხის აღკვეთილის ძირითადი მიზნით განსაზღვრული პონტოს მუხის ტყის დაცვა, მოვლა და აღდგენა; ბ) ბუნებრივი პროცესების უწყვეტი განვითარების მიზნით პონტოს მუხის აღკვეთილის იმ უბნების დაცვისა და აღდგენის ხელშეწყობა, რომლებიც ერთმანეთისგან ბიოლოგიური მრავალფეროვნებითა და ბუნებრივი და კულტურული მახასიათებლებით გამოირჩევა; გ) ბუნებრივი ეკოსისტემებისა და ლანდშაფტების, ფლორისა და ფაუნის ბიოლოგიური მრავალფეროვნების, განსაკუთრებით კი − გადაშენების საფრთხის წინაშე მყოფ მცენარეთა და ცხოველთა გენოფონდის დაცვის, მოვლის, აღდგენისა და შენარჩუნების უზრუნველყოფა; დ) ბუნებრივ გარემოში დასვენებისა და ეკოტურიზმის მდგრადი განვითარებისთვის ხელსაყრელი პირობების შექმნის ხელშეწყობა; ე) პონტოს მუხის აღკვეთილის მიწის, წყლის, ფლორის (ტყის ჩათვლით), ფაუნისა და სხვა ბუნებრივი რესურსების დაცვის, მოვლის, აღდგენისა და რაციონალური გამოყენების უზრუნველყოფა; ვ) საგანმანათლებლო და მეცნიერული კვლევისა და შესწავლისთვის ხელსაყრელი პირობების შექმნა. 3. პონტოს მუხის აღკვეთილის ფუნქციურ-გეგმარებითი ორგანიზება (ზონირება) და ზონებში დაშვებული საქმიანობები, „დაცული ტერიტორიების სისტემის შესახებ“ საქართველოს კანონის შესაბამისად, დგინდება პონტოს მუხის აღკვეთილის მენეჯმენტის გეგმით. მუხლი 4. პონტოს მუხის აღკვეთილის მდებარეობა, ფართობი და საზღვრები 1. პონტოს მუხის აღკვეთილი საქართველოს დაცული ტერიტორიების სისტემის ნაწილია. ის იქმნება ამ კანონით დადგენილი საზღვრების ფარგლებში. 2. პონტოს მუხის აღკვეთილი იქმნება ჩოხატაურის მუნიციპალიტეტის ადმინისტრაციულ საზღვრებში მოქცეულ ტერიტორიაზე, რომლის საერთო ფართობია 443 ჰექტარი. 3. პონტოს მუხის აღკვეთილი მოიცავს შემდეგ გეოგრაფიულ კოორდინატებს:
მუხლი 5. პონტოს მუხის აღკვეთილის დაცვისა და გამოყენების რეჟიმი პონტოს მუხის აღკვეთილის დაცვისა და გამოყენების რეჟიმი განისაზღვრება საქართველოს კანონმდებლობისა და პონტოს მუხის აღკვეთილის მენეჯმენტის გეგმის შესაბამისად. მუხლი 6. პონტოს მუხის აღკვეთილის სახელმწიფო მართვა პონტოს მუხის აღკვეთილის სახელმწიფო მართვა ხორციელდება „დაცული ტერიტორიების სისტემის შესახებ“ საქართველოს კანონის შესაბამისად. მუხლი 7. გარდამავალი დებულება ეს კანონი არ ვრცელდება პონტოს მუხის აღკვეთილის ამ კანონით დადგენილ საზღვრებში ამავე კანონის ამოქმედებამდე არსებულ: ა) ქონებრივ ურთიერთობებზე (მიწის ნაკვეთის ყიდვა-გაყიდვის, უზუფრუქტის, აღნაგობის, ქირავნობის, გაცვლის, გაჩუქების, მემკვიდრეობით გადაცემის, იპოთეკის, იჯარით გაცემის შემთხვევაში არსებულ ურთიერთობათა ჩათვლით); ბ) სასარგებლო წიაღისეულით სარგებლობასთან დაკავშირებულ ურთიერთობებზე; გ) „ნავთობისა და გაზის შესახებ“ საქართველოს კანონის შესაბამისად დადებული ხელშეკრულებებით ან/და გაცემული ლიცენზიებით განსაზღვრულ ურთიერთობებზე. მუხლი 8. კანონის ამოქმედება ეს კანონი ამოქმედდეს გამოქვეყნებისთანავე. |
თბილისი, 30 მაისი 2019 წ. N4722-IIს |
დოკუმენტის კომენტარები