„გადასახადების ადმინისტრირების შესახებ" საქართველოს ფინანსთა მინისტრის 2010 წლის 31 დეკემბრის №996 ბრძანებაში ცვლილების შეტანის შესახებ

საქართველოს ფინანსთა მინისტრის

ბრძანება №428

2011 წლის 8 აგვისტო

ქ. თბილისი

„გადასახადების ადმინისტრირების შესახებ“ საქართველოს ფინანსთა მინისტრის           2010 წლის 31 დეკემბრის №996 ბრძანებაში ცვლილების შეტანის შესახებ

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად, ვბრძანებ:

მუხლი 1. „გადასახადების ადმინისტრირების შესახებ“ საქართველოს ფინანსთა მინისტრის 2010 წლის 31 დეკემბრის №996 ბრძანებით (სსმ, 3.01.11) დამტკიცებულ ინსტრუქციაში შეტანილ იქნეს შემდეგი ცვლილება:

1. 75² მუხლის პირველი პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) ეწევა საცალო ვაჭრობას სტაციონარულ სავაჭრო ობიექტში;“.

2. 75² მუხლს დაემატოს შემდეგი შინაარსის 1¹ პუნქტი:

„1¹. დაინტერესებული პირი ვალდებულია განცხადებაში მიუთითოს იმ სავაჭრო ობიექტების ნუსხა, სადაც განხორციელდება ქვითრის გაცემა.“.

3. 75² მუხლის მე-5 პუნქტი ამოღებულ იქნეს.

4. 75³ მუხლის პირველ პუნქტს დაემატოს შედეგი შინაარსის „თ“ ქვეპუნქტი:

„თ) სავაჭრო ობიექტების (სადაც ხორციელდება ქვითრის გაცემა) ნუსხაში ცვლილების განხორციელების შესახებ აცნობოს შემოსავლების სამსახურს. სავაჭრო ობიექტების ნუსხაში დამატების განხორციელების შემთხვევაში, უფლებამოსილ გამყიდველს უფლება აქვს სავაჭრო ობიექტში ქვითარი გასცეს შემოსავლების სამსახურისთვის სავაჭრო ობიექტის დამატების შესახებ ინფორმაციის წარდგენის მეორე სამუშაო დღიდან.“.

მუხლი 2. უფლებამოსილი გამყიდველი, რომელსაც 2011 წლის 18 ივლისამდე ქვითრის გაცემის უფლება მინიჭებული აქვს თითოეული სავაჭრო ობიექტის მიხედვით, უფლებამოსილია, ქვითარი გასცეს მის სარგებლობაში არსებულ სხვა სავაჭრო ობიექტებშიც.

მუხლი 3. ამ ბრძანების მე-2 მუხლით გათვალისწინებულ შემთხვევაში უფლებამოსილი გამყიდველი ვალდებულია შემოსავლების სამსახურს აცნობოს სავაჭრო ობიექტების ნუსხა, სადაც გამოიყენებს ქვითრის გაცემის უფლებას. ზემოაღნიშნულ სავაჭრო ობიექტებში ქვითრის გაცემის უფლება უფლებამოსილ გამყიდველს ენიჭება შემოსავლების სამსახურისათვის შესაბამისი ინფორმაციის წარდგენის მეორე სამუშაო დღიდან.

მუხლი 4. ეს ბრძანება ამოქმედდეს გამოქვეყნებისთანავე და მისი მოქმედება გავრცელდეს 2011 წლის 18 ივლისიდან წარმოშობილ სამართლებრივ ურთიერთობებზე.

დ. გვინდაძე