„სხვა ქვეყნების ვალუტების მიმართ ეროვნული ვალუტის ოფიციალური გაცვლითი კურსის განსაზღვრის წესის დამტკიცების შესახებ“ საქართველოს ეროვნული ბანკის საბჭოს 2009 წლის 22 მაისის N6 დადგენილებაში ცვლილების შეტანის თაობაზე

1. პირველის მუხლის მე-5 პუნქტის შემდეგ დაემატოს შემდეგი შინაარსის მე-6 პუნქტი:

„6. იმ უცხოური ვალუტისათვის, რომელზეც ეროვნული ბანკი არ ახდენს ოფიციალური გაცვლითი კურსის გამოქვეყნებას, დაინტერესებულ პირებს შეუძლიათ გამოიყენონ აშშ დოლარის მიმართ ლარის ოფიციალური გაცვლითი კურსისა და აშშ დოლარის მიმართ ასეთი უცხოური ვალუტის საბაზრო კურსის კროს-კურსები.“.

2. მე-2 მუხლის მე-2 პუნქტი ჩამოყალიბდეს შემდეგი რედაქციით:

„2. აშშ დოლარის მიმართ ლარის ოფიციალური გაცვლითი კურსი არის გასაანგარიშებელი პერიოდის განმავლობაში სავაჭრო სისტემაში დადებულ სპოტ გარიგებათა გათვალისწინებით გამოთვლილი საშუალო შეწონილი კურსი. ამ წესის მიზნებისათვის დადებულ გარიგებებში შედის:

ა) საქართველოს ეროვნული ბანკის ლიცენზირებულ კომერციულ ბანკებს შორის სავაჭრო სისტემაში დადებული სპოტ სავალუტო გარიგებები;

ბ) საქართველოს ეროვნულ ბანკთან საქართველოს ეროვნული ბანკის ლიცენზირებული კომერციული ბანკების სავაჭრო სისტემაში დადებული სპოტ სავალუტო გარიგებები;

გ) საქართველოს ეროვნული ბანკის ლიცენზირებულ კომერციულ ბანკებსა და რეგისტრირებულ მიკროსაფინანსო ორგანიზაციებს შორის სავაჭრო სისტემაში დადებული სპოტ სავალუტო გარიგებები.“.

3. მე-2 მუხლის მე-3 პუნქტის „ბ“ ქვეპუნქტის შემდეგ დაემატოს შემდეგი შინაარსის „გ“ ქვეპუნქტი:

„გ) გარიგებები, რომლებიც ეროვნული ბანკის მიერ ჩაითვლება არასაბაზრო პირობებით დადებულ გარიგებად.“.