ევროპარლამენტისა და საბჭოს 2002 წლის 19 ივლისის რეგულაცია (EC) No 1606/2002 ბუღალტრული აღრიცხვის საერთაშორისო სტანდარტების გამოყენების შესახებ

ორიგინალი ვერსია იხილეთ ბმულზე

„საქართველოს საკანონმდებლო მაცნეს“ ვებგვერდზე განთავსებულ ევროკავშირის კანონმდებლობის აქტების ქართულენოვან ვერსიებს არ გააჩნია ოფიციალური იურიდიული ძალა

ევროპარლამენტისა და საბჭოს 2002 წლის 19 ივლისის რეგულაცია (EC) No 1606/2002

ბუღალტრული აღრიცხვის საერთაშორისო სტანდარტების გამოყენების შესახებ

ევროპარლამენტმა და ევროკავშირის საბჭომ,

ითვალისწინებენ რა ევროგაერთიანების დამფუძნებელი ხელშეკრულების, კერძოდ კი, ამ ხელშეკრულების 95(1)-ე მუხლს,

ითვალისწინებენ რა კომისიის წინადადებას¹,

ითვალისწინებენ რა ევროპის ეკონომიკურ და სოციალურ საკითხთა კომიტეტის მოსაზრებას²,

მოქმედებენ რა ხელშეკრულების 251-ე მუხლით დადგენილი პროცედურის შესაბამისად³,

ვინაიდან:

1. 2000 წლის 23 და 24 მარტის ლისაბონის ევროპულმა საბჭომ ხაზი გაუსვა, რომ აუცილებელია ფინანსური მომსახურებების შიდა ბაზრის ჩამოყალიბების პროცესის დასრულების დაჩქარება, კომისიის ფინანსური მომსახურებების სამოქმედო გეგმის განხორციელების ბოლო ვადად განსაზღვრა 2005 წელი და მოითხოვა ნაბიჯების გადადგმა ღია სააქციო საზოგადოებების მიერ მომზადებული ფინანსური ანგარიშგებების შედარებითობის გასაზრდელად.
2. შიდა ბაზრის უკეთ ფუნქციონირების ხელშესაწყობად, ღია სააქციო საზოგადოებებს უნდა მოეთხოვოთ მაღალი ხარისხის ბუღალტრული აღრიცხვის საერთაშორისო სტანდარტების ერთიანი კრებულის გამოყენება მათი კონსოლიდირებული ფინანსური ანგარიშგებების მოსამზადებლად. გარდა ამისა, მნიშვნელოვანია, რომ ფინანსური ბაზრების მონაწილე, გაერთიანების კომპანიების მიერ გამოყენებული ფინანსური ანგარიშგების სტანდარტები საერთაშორისო მასშტაბით იყოს მიღებული და ისინი ნამდვილად გლობალურ სტანდარტებს წარმოადგენდნენ. ეს გულისხმობს საერთაშორისო დონეზე ამჟამად გამოყენებული ბუღალტრული აღრიცხვის სტანდარტების კონვერგენციის ზრდას, რომლის საბოლოო მიზანია ბუღალტრული აღრიცხვის გლობალური სტანდარტების ერთიანი კრებულის შექმნა.
3. საბჭოს 1978 წლის 25 ივლისის 78/660/EEC დირექტივა გარკვეული სახის კომპანიების⁴ ბუღალტრული აღრიცხვის წლიური ანგარიშების შესახებ, საბჭოს 1983 წლის 13 ივნისის 83/349/EEC დირექტივა ბუღალტრული აღრიცხვის კონსოლიდირებული ანგარიშების⁵ შესახებ, საბჭოს 1986 წლის 8 დეკემბრის 86/635/EEC დირექტივა ბანკებისა და სხვა საფინანსო ინსტიტუტების⁶ ბუღალტრული აღრიცხვის წლიური ანგარიშებისა და ბუღალტრული აღრიცხვის კონსოლიდირებული ანგარიშების შესახებ და საბჭოს 1991 წლის 19 დეკემბრის 91/674/EEC დირექტივა სადაზღვევო კომპანიების⁷ ბუღალტრული აღრიცხვის წლიური ანგარიშებისა და ბუღალტრული აღრიცხვის კონსოლიდირებული ანგარიშების შესახებ აგრეთვე განკუთვნილია გაერთიანების ღია სააქციო საზოგადოებებისთვის. ამ დირექტივებში მოცემული ანგარიშგების მოთხოვნები ვერ უზრუნველყოფენ გაერთიანების ყველა ღია სააქციო საზოგადოების ფინანსური ანგარიშგების გამჭვირვალობისა და შედარებითობის მაღალ დონეს, რაც წარმოადგენს აუცილებელ პირობას ისეთი ინტეგრირებული სასესხო კაპიტალის ბაზრის შესაქმნელად, რომელიც ფუნქციონირებს ეფექტურად, შეუფერხებლად და ეფექტიანად. ამიტომ, აუცილებელია ღია სააქციო საზოგადოებების მიმართ გამოყენებული სამართლებრივი ჩარჩოს სრულყოფა.
4. წინამდებარე რეგულაციის მიზანია ხელი შეუწყოს სასესხო კაპიტალის ბაზრის ეფექტიან და ხარჯთეფექტურ ფუნქციონირებას. ინვესტორების დაცვა და ფინანსური ბაზრების მიმართ ნდობის შენარჩუნება აგრეთვე წარმოადგენს შიდა ბაზრის ჩამოყალიბების დასრულების მნიშვნელოვან ასპექტს ამ სფეროში. წინამდებარე რეგულაციის მეშვეობით ხდება შიდა ბაზარზე კაპიტალის თავისუფალი გადაადგილების გაძლიერება და იგი შესაძლებლობას აძლევს გაერთიანების კომპანიებს, ერთმანეთს თანაბარი პირობებით გაუწიონ კონკურენცია გაერთიანების სასესხო კაპიტალის ბაზრებზე, აგრეთვე მსოფლიოს სასესხო კაპიტალის ბაზრებზე ხელმისაწვდომი ფინანსური სახსრებისთვის.
5. გაერთიანების სასესხო კაპიტალის ბაზრების კონკურენტუნარიანობისთვის მნიშვნელოვანია ფინანსური ანგარიშგებების მოსამზადებლად ევროპაში გამოყენებული სტანდარტების ბუღალტრული აღრიცხვის იმ საერთაშორისო სტანდარტებთან კონვერგენციის მიღწევა, რომლებიც შეიძლება გლობალურად იქნას გამოყენებული ტრანსსასაზღვრო გარიგებებისთვის, ან მსოფლიოს ნებისმიერ კუთხეში ლისტინგისთვის.
6. 2000 წლის 13 ივნისს, კომისიამ გამოაქვეყნა საკუთარი ოფიციალური მიმართვა „ევროკავშირის ფინანსური ანგარიშგების სტრატეგიის: შემდგომი ნაბიჯი“-ს შესახებ, რომელშიც შეთავაზებული იყო, რომ გაერთიანების ყველა ღია სააქციო საზოგადოებას, არაუგვიანეს 2005 წლისა, მოემზადებინა საკუთარი კონსოლიდირებული ფინანსური ანგარიშგებები ბუღალტრული აღრიცხვის სტანდარტების ერთი მთლიანი კრებულის, კერძოდ, ბუღალტრული აღრიცხვის საერთაშორისო სტანდარტების (IAS) შესაბამისად.
7. ბუღალტრული აღრიცხვის საერთაშორისო სტანდარტებს (IASs) შეიმუშავებს ბუღალტრული აღრიცხვის საერთაშორისო სტანდარტების კომიტეტი (IASC), რომლის მიზანია ბუღალტრული აღრიცხვის გლობალური სტანდარტების ერთიანი კრებულის შემუშავება. IASC-ის რესტრუქტურიზაციის საფუძველზე, 2001 წლის 1 აპრილს, ახალმა საბჭომ, თავისი ერთ-ერთი პირველი გადაწყვეტილების სახით, IASC-სს გადაარქვა სახელი და უწოდა ბუღალტრული აღრიცხვის საერთაშორისო სტანდარტების საბჭო (IASB), ხოლო რამდენადაც სამომავლო ინტერესის საგანს წარმოადგენს ბუღალტრული აღრიცხვის საერთაშორისო სტანდარტები, IAS-სს გადაარქვა სახელი და უწოდა ფინანსური ანგარიშგების საერთაშორისო სტანდარტები (IFRS). ეს სტანდარტები, სადაც ეს შესაძლებელია და იმ პირობით, თუ ისინი უზრუნველყოფენ გაერთიანებაში ფინანსური ანგარიშგების გამჭვირვალობისა და შედარებითობის მაღალ ხარისხს, სავალდებულო უნდა გახდეს გაერთიანების ყველა ღია სააქციო საზოგადოების მიერ გამოსაყენებლად.
8. წინამდებარე რეგულაციის განსახორციელებლად აუცილებელი ზომები მიღებულ უნდა იქნეს საბჭოს 1999 წლის 28 ივნისის 1999/468/EC გადაწყვეტილების შესაბამისად, რომელიც განსაზღვრავს კომისიისთვის[8] გადაცემული განმახორციელებელი უფლებამოსილებების განხორციელების პროცედურებს და სადაც სათანადო წესით გათვალისწინებულია კომისიის მიერ, ევროპარლამენტში, 2002 წლის 5 თებერვალს გაკეთებული განცხადება ფინანსური მომსახურებების შესახებ კანონმდებლობის განხორციელებასთან დაკავშირებით.
9. გაერთიანებაში გამოყენების მიზნით ბუღალტრული აღრიცხვის საერთაშორისო სტანდარტის მისაღებად, პირველ რიგში აუცილებელია, რომ ის აკმაყოფილებდეს საბჭოს ზემოაღნიშნული დირექტივების ძირითად მოთხოვნას, ანუ მისი გამოყენების შედეგად უნდა შეიქმნას საწარმოს ფინანსური მდგომარეობისა და საქმიანობის შესახებ უტყუარი და ობიექტური სურათი – ეს პრინციპი მხედველობაში მიიღება საბჭოს ზემოაღნიშნული დირექტივების ჭრილში, რაც არ გულისხმობს ამ დირექტივების უკლებლივ ყველა დებულებასთან მკაცრ შესაბამისობას; მეორე – აუცილებელია, რომ საბჭოს 2000 წლის 17 ივლისის დასკვნების მიხედვით, ეს სტანდარტი ყველა პირობას ქმნიდეს იმისათვის, რომ ხელი შეუწყოს ევროპაში საზოგადოებრივ კეთილდღეობას და ბოლოს, რომ ის აკმაყოფილებდეს იმ ძირითად კრიტერიუმებს, რომლებიც შეეხება ფინანსური ანგარიშგებებისთვის საჭირო მომხმარებლების მიერ გამოყენებადი ინფორმაციის ხარისხს.
10. ბუღალტრული აღრიცხვის ტექნიკურმა კომიტეტმა კომისიას უნდა გაუწიოს მხარდაჭერა და გადასცეს შესაბამისი სპეციალური ცოდნა ბუღალტრული აღრიცხვის საერთაშორისო სტანდარტების შეფასებაში.
11. დამტკიცების მექანიზმმა ოპერატიულად უნდა იმოქმედოს შეთავაზებულ ბუღალტრული აღრიცხვის საერთაშორისო სტანდარტებზე და აღნიშნული მექანიზმი აგრეთვე უნდა წარმოადგენდეს საშუალებას, რომლის დახმარებითაც მოხდება ბუღალტრული აღრიცხვის საერთაშორისო სტანდარტების შესახებ ინფორმაციაზე მსჯელობა, მისი ასახვა და გაცვლა მთავარ დაინტერესებულ მხარეებს შორის, კერძოდ, იმ პირებს შორის, ვინც შეადგინა ბუღალტრული აღრიცხვის ეროვნული სტანდარტები, ფასიანი ქაღალდების, საბანკო საქმისა და დაზღვევის სფეროებში ზედამხედველებს შორის, ცენტრალურ ბანკებს (მათ შორის ევროპის ცენტრალური ბანკი) შორის, ბუღალტრული აღრიცხვის პროფესიების წარმომადგენლებსა და ბუღალტული აღრიცხვის ანგარიშების მომხმარებლებელ და შემდგენელ პირებს შორის. ზემოაღნიშნული მექანიზმი უნდა იყოს საშუალება, რომელიც ხელს შეუწყობს მიღებული ბუღალტრული აღრიცხვის საერთაშორისო სტანდარტების თანაბარ გაგებას გაერთიანებაში.
12. პროპორციულობის პრინციპის შესაბამისად, წინამდებარე რეგულაციით გათვალისწინებული ზომები, რომლებითაც მოითხოვება, რომ ბუღალტრული აღრიცხვის საერთაშორისო სტანდარტები გამოყენებულ იქნას ღია სააქციო საზოგადოებების მიმართ, აუცილებელია იმ მიზნის მისაღწევად, რომელიც გულისხმობს გაერთიანების სასესხო კაპიტალის ბაზრების ეფექტიანი და ხარჯთეფექტური ფუნქციონირების და შესაბამისად, შიდა ბაზრის ჩამოყალიბების პროცესის დასრულებისთვის ხელშეწყობას.
13. ამავე პრინციპის მიხედვით, ბუღალტრული აღრიცხვის წლიურ ანგარიშებთან დაკავშირებით აუცილებელია, რომ წევრ სახელმწიფოებს ჰქონდეთ არჩევანი, ღია სააქციო საზოგადოებებს მისცენ მათი მომზადების უფლება, თუ მოითხოვონ მათგან ამ ანგარიშების მომზადება წინამდებარე რეგულაციაში განსაზღვრული პროცედურის შესაბამისად მიღებული ბუღალტრული აღრიცხვის საერთაშორისო სტანდარტების შესაბამისად. წევრ სახელმწიფოებს უფლება აქვთ აგრეთვე განავრცონ ეს უფლება ან მოთხოვნა სხვა კომპანიებზე, მათ მიერ ბუღალტრული აღრიცხვის კონსოლიდირებული ანგარიშების, ან/და ბუღალტრული აღრიცხვის წლიური ანგარიშების მომზადებასთან დაკავშირებით.
14. იმისათვის, რომ მოხდეს შეხედულებების ურთიერთგაზიარების ხელშეწყობა და წევრ სახელმწიფოებს ჰქონეთ მათი პოზიციების კოორდინირების შესაძლებლობა, კომისიამ პერიოდულად უნდა აცნობოს ბუღალტრული აღრიცხვის მარეგულირებელ კომიტეტს IASB-ის მიერ გაცემული აქტიური პროექტების, განსახილველი დოკუმენტების, დოკუმენტების შედარებისა და დასამტკიცებელი დოკუმენტების შუალედური ვერსიების შესახებ და აგრეთვე ბუღალტრული აღრიცხვის ტექნიკური კომიტეტის შემდგომი ტექნიკური სამუშაოს შესახებ. აგრეთვე მნიშვნელოვანია, რომ ბუღალტრული აღრიცხვის მარეგულირებელ კომიტეტს ადრეულ ეტაპზე ეცნობოს იმის შესახებ, გეგმავს თუ არა კომისია ბუღალტრული აღრიცხვის საერთაშორისო სტანდარტის მიღების შეთავაზებას.
15. ბუღალტრული აღრიცხვის საერთაშორისო სტანდარტების (IFRS და SIC-IFRIC) შემუშავების პროცესში, IASB-ის მიერ გაცემული დოკუმენტებისა და საბუთების შესახებ საკუთარი მსჯელობისას და მათთან დაკავშირებით მისაღები საკუთარი პოზიციების შემუშავებისას, კომისიამ უნდა გაითვალისწინოს არახელსაყრელი კონკურენციის პირობების თავიდან აცილების მნიშვნელობა ევროპის იმ კომპანიებისთვის, რომლებიც მოღვაწეობენ გლობალურ ბაზარზე, ხოლო რამდენადაც ეს მაქსიმალურ ფარგლებში შესაძლებელია, უნდა გაითვალისწინოს ბუღალტრული აღრიცხვის მარეგულირებელ კომიტეტში არსებული დელეგაციების მიერ გამოთქმული შეხედულებები. კომისია წარმოდგენილი იქნება IASB-ის შემადგენელ ორგანოებში.
16. სათანადო და მკაცრი აღსრულების რეჟიმი გადამწყვეტი ფაქტორია ფინანსური ბაზრების მიმართ ინვესტორთა ნდობისგასამყარებლად. წევრ სახელმწიფოებს, ხელშეკრულების მე-10 მუხლის საფუძველზე, მოეთხოვებათ სათანადო ზომების მიღება ბუღალტრული აღრიცხვის საერთაშორისო სტანდარტებთან შესაბამისობის უზრუნველყოფისთვის. კომისია გეგმავს წევრ სახელმწიფოებთან ურთიერთობას, განსაკუთრებით, ფასიანი ქაღალდების მარეგულირებელი ევროპული კომიტეტის (CESR) მეშვეობით, აღსრულების მიმართ ერთიანი მიდგომის შესამუშავებლად.
17. ამის გარდა, აუცილებელია, წევრ სახელმწიფოებს მიეცეთ შესაძლებლობა, 2007 წლამდე გადაავადონ გარკვეული დებულებების გამოყენება როგორც გაერთიანებაში, ისე მესამე ქვეყნის რეგულირებულ ბაზარზე არსებული იმ ღია სააქციო საზოგადოებებისთვის, რომლებიც უკვე იყენებენ საერთაშორისო დონეზე უკვე მიღებული სტანდარტების სხვა კრებულს, რომელიც გამოიყენება, როგორც პირველადი საფუძველი მათი ბუღალტრული აღრიცხვის კონსოლიდირებული ანგარიშებისთვის, აგრეთვე იმ კომპანიებისთვის, რომლებსაც გააჩნიათ მხოლოდ ბაზარზე მბრუნავი სავალო ფასიანი ქაღალდები. ამის მიუხედავად, უაღრესად მნიშვნელოვანია, რომ ყველაზე გვიან 2007 წლისთვის, გაერთიანების რეგულირებულ ბაზარზე არსებულ ყველა ღია სააქციო საზოგადოებაზე გავრცელდეს გლობალური ბუღალტრული აღრიცხვის საერთაშორისო სტანდარტების  – IAS-ის კრებული.
18. იმისათვის, რომ წევრ სახელმწიფოებსა და კომპანიებს მიეცეთ შესაძლებლობა განახორციელონ აუცილებელი ცვლილებები იმისათვის, რომ ბუღალტრული აღრიცხვის საერთაშორისო სტანდარტების გამოყენება გახადონ შესაძლებელი, საჭიროა გარკვეული დებულებების გამოყენება მხოლოდ 2005 წელს. სათანადო დებულებები უნდა ამოქმედდეს მას შემდეგ, რაც წინამდებარე რეგულაციის ძალაში შესვლის შედეგად კომპანიები პირველად გამოიყენებენ IAS-სს. ეს დებულებები უნდა შემუშავდეს საერთაშორისო დონეზე, რათა უზრუნველყოფილ იქნას მიღებული გადაწყვეტების საერთაშორისო აღიარება,

მიიღეს წინამდებარე რეგულაცია:

მუხლი 1

მიზანი

წინამდებარე რეგულაცია მიზნად ისახავს გაერთიანებაში ბუღალტრული აღრიცხვის საერთაშორისო სტანდარტების მიღებასა და გამოყენებას, მე-4 მუხლში მითითებული კომპანიების მიერ წარდგენილი ფინანსური ინფორმაციის ჰარმონიზაციის მიზნით, რათა უზრუნველყოფილ იქნას გამჭვირვალობისა და ფინანსური ანგარიშგებების შედარებითობის მაღალი ხარისხი და აქედან გამომდინარე, გაერთიანების სასესხო კაპიტალის ბაზრისა და შიდა ბაზრის ეფექტიანი ფუნქციონირება.

მუხლი 2

განმარტებები

წინამდებარე რეგულაციის მიზნისთვის, „ბუღალტრული აღრიცხვის საერთაშორისო სტანდარტები“ ნიშნავს ბუღალტრული აღრიცხვის საერთაშორისო სტანდარტებს (IAS), ფინანსური ანგარიშგების საერთაშორისო სტანდარტებს (IFRS) და მასთან დაკავშირებულ განმარტებებს (SIC-IFRIC განმარტებები), ამ სტანდარტების და მათთან დაკავშირებული განმარტებების სათანადო შესწორებებს, სამომავლო სტანდარტებსა და მათთან დაკავშირებულ განმარტებებს, რომლებიც გაცემულია ან მიღებულია ბუღალტრული აღრიცხვის საერთაშორისო სტანდარტების საბჭოს (IASB) მიერ.

მუხლი 3

ბუღალტრული აღრიცხვის საერთაშორისო სტანდარტების მიღება და გამოყენება

1. 6(2)-ე მუხლში განსაზღვრული პროცედურის შესაბამისად, კომისიამ უნდა მიიღოს გადაწყვეტილება გაერთიანების ფარგლებში ბუღალტრული აღრიცხვის საერთაშორისო სტანდარტების გამოყენებადობის თაობაზე.

2. ბუღალტრული აღრიცხვის საერთაშორისო სტანდარტები შეიძლება მიღებულ იქნას მხოლოდ იმ შემთხვევაში, თუ:

• ისინი არ ეწინააღმდეგებიან 78/660/EEC დირექტივის 2(3)-ე მუხლში და 83/349/EEC დირექტივის 16(3)-ე მუხლში მოცემულ პრინციპს და ხელს უწყობენ ევროპული საზოგადოების კეთილდღეობას და
• ისინი აკმაყოფილებენ გასაგებობის, რელევანტურობის, საიმედოობისა და შედარებითობის იმ კრიტერიუმებს, რომლებიც მოითხოვება ეკონომიკური გადაწყვეტილებების მიღებისა და მენეჯმენტის კონტროლის შეფასებისთვის საჭირო ფინანსური ინფორმაციისთვის.

3. არაუგვიანეს 2002 წლის 31 დეკემბრისა, კომისიამ, 6(2)-ე მუხლში განსაზღვრული პროცედურის შესაბამისად, უნდა მიიღოს გადაწყვეტილება, წინამდებარე რეგულაციის ძალაში შესვლისთვის, გაერთიანების ფარგლებში არსებული ბუღალტრული აღრიცხვის საერთაშორისო სტანდარტების გამოყენებადობის თაობაზე.

4. მიღებული ბუღალტრული აღრიცხვის საერთაშორისო სტანდარტები სრულად უნდა გამოქვეყნდეს გაერთიანების ყველა ოფიციალურ ენაზე, კომისიის რეგულაციის სახით, ევროგაერთიანებების ოფიციალურ ჟურნალში.

მუხლი 4

ღია სააქციო საზოგადოებების ბუღალტრული აღრიცხვის კონსოლიდირებული ანგარიშები

ყოველი ფინანსური წლისთვის, რომელიც იწყება 2005 წლის 1 იანვარს ან ამ თარიღის შემდეგ, კომპანიებმა, რომლებზეც ვრცელდება წევრი სახელმწიფოს კანონმდებლობა, უნდა მოამზადონ ბუღალტრული აღრიცხვის საკუთარი კონსოლიდირებული ანგარიშები 6(2)-ე მუხლში განსაზღვრული პროცედურის შესაბამისად მიღებული ბუღალტრული აღრიცხვის საერთაშორისო სტანდარტების შესაბამისად, თუ მათი ბალანსის უწყისის თარიღისთვის, მათი ფასიანი ქაღალდები ვაჭრობისთვის დაშვებულია ნებისმიერი წევრი სახელმწიფოს რეგულირებულ ბაზარზე, ფასიანი ქაღალდების სფეროში საინვესტიციო მომსახურებების შესახებ საბჭოს 1993 წლის 10 მაისის 93/22/EEC დირექტივის 1(13)-ე მუხლის კონტექსტში[9].

მუხლი 5

არჩევანის უფლება ბუღალტრული აღრიცხვის წლიურ ანგარიშებთან და დახურულ სააქციო საზოგადოებებთან მიმართებაში

წევრ სახელმწიფოებს უფლება აქვთ ნება დართონ ან მოითხოვონ, რომ:

1. მე-4 მუხლში მითითებულმა კომპანიებმა მოამზადონ ბუღალტრული აღრიცხვის საკუთარი წლიური ანგარიშები,
2. კომპანიებმა, გარდა მე-4 მუხლში მითითებული კომპანიებისა, მოამზადონ ბუღალტრული აღრიცხვის საკუთარი კონსოლიდირებული ანგარიშები ან/და ბუღალტრული აღრიცხვის საკუთარი წლიური ანგარიშები,

6(2)-ე მუხლში განსაზღვრული პროცედურის შესაბამისად მიღებული ბუღალტრული აღრიცხვის საერთაშორისო სტანდარტებთან შესაბამისობაში.

მუხლი 6

საკომიტეტო პროცედურა

1. კომისიას დახმარებას უნდა უწევდეს ბუღალტრული აღრიცხვის მარეგულირებელი კომიტეტი, შემდგომში მოხსენიებული როგორც „კომიტეტი“.

2. თუ მითითება კეთდება ამ პუნქტზე, გამოიყენება 1999/468/EC გადაწყვეტილების მე-5 და მე-7 მუხლები, ამავე გადაწყვეტილების მე-8 მუხლის დებულებების გათვალისწინებით.

1999/468/EC გადაწყვეტილების მე-5 მუხლის მე-6 პუნქტით განსაზღვრული პერიოდი უნდა განისაზღვროს სამ თვედ.

3. კომიტეტმა უნდა მიიღოს საკუთარი რეგლამენტი.

მუხლი 7

ანგარიშგება და კოორდინაცია

1. კომისიამ რეგულარულად უნდა იქონიოს ურთიერთობა კომიტეტთან IASB-ის აქტიური პროექტებისა და IASB-ის მიერ გაცემული ნებისმიერი მასთან დაკავშირებული დოკუმენტის სტატუსთან დაკავშირებით, რათა მოახდინოს პოზიციების კოორდინირება და ხელი შეუწყოს იმ სტანდარტების მიღებასთან დაკავშირებით განხილვების ჩატარებას, რომლებიც შეიძლება მომდინარეობდნენ ამ პროექტებიდან და დოკუმენტებიდან.

2. კომისიამ სათანადოდ და დროულად უნდა შეატყობინოს კომიტეტს იმის შესახებ, გეგმავს თუ არა იგი სტანდარტის მიღებასთან დაკავშირებით წინადადების შეთავაზებას.

მუხლი 8

შეტყობინება

იმ შემთხვევაში, როცა წევრი სახელმწიფოები იღებენ ზომებს მე-5 მუხლის საფუძველზე, მათ ეს ზომები დაუყოვნებლივ უნდა შეატყობინონ კომისიასა და სხვა წევრ სახელმწიფოებს.

მუხლი 9

გარდამავალი დებულებები

მე-4 მუხლიდან გამონაკლისის სახით, წევრ სახელმწიფოებს უფლება აქვთ უზრუნველყონ, რომ მე-4 მუხლის მოთხოვნები გამოიყენებოდეს მხოლოდ იმ ყოველი ფინანსური წლისთვის, რომელიც იწყება 2007 წლის იანვარში ან მის შემდეგ, შემდეგ კომპანიებთან მიმართებაში:

1. რომელთა სავალო ფასიანი ქაღალდები დაშვებულია ნებისმიერი წევრი სახელმწიფოს მხოლოდ რეგულირებულ ბაზარზე, 93/22/EEC დირექტივის 1(13)-ე მუხლის კონტექსტში; ან
2. რომელთა ფასიანი ქაღალდები ღია ვაჭრობისთვის დაშვებულია არაწევრ სახელმწიფოში და რომლებიც, ამ მიზნით, იყენებდნენ საერთაშორისო დონეზე მიღებულ სტანდარტებს იმ ფინანსური წლიდან, რომელიც დაიწყო წინამდებარე რეგულაციის ევროგაერთიანებების ოფიციალურ ჟურნალში გამოქვეყნებამდე.

მუხლი 10

ინფორმაცია და განხილვა

კომისიამ უნდა განიხილოს წინამდებარე რეგულაციის მოქმედება და ამის შესახებ ანგარიში უნდა წარუდგინოს ევროპარლამენტსა და საბჭოს არაუგვიანეს 2007 წლის 1 ივლისისთვის.

მუხლი 11

ძალაში შესვლა

წინამდებარე რეგულაცია ძალაში შედის მისი ევროგაერთიანების ოფიციალურ ჟურნალში გამოქვეყნებიდან მესამე დღეს.

წინამდებარე რეგულაცია შესასრულებლად სავალდებულოა მთლიანობაში და ის გამოიყენება უშუალოდ ყველა წევრ სახელმწიფოში.

შედგენილია ბრიუსელში, 2002 წლის 19 ივლისს.

ევროპარლამენტის სახელით                             საბჭოს სახელით

თავმჯდომარე     თავმჯდომარე

პ. კოქსი                                                       პ. პედერსენი