„საჯარო სამართლის იურიდიული პირის − ლევან სამხარაულის სახელობის სასამართლო ექსპერტიზის ეროვნული ბიუროს დებულების დამტკიცების შესახებ“ საქართველოს მთავრობის 2010 წლის 20 აგვისტოს №255 დადგენილებაში ცვლილების შეტანის თაობაზე

1. მე-4 მუხლის მე-3 პუნქტის „დ“, „ლ“, „პ“ და „ს“ ქვეპუნქტები ჩამოყალიბდეს შემდეგი რედაქციით:

„დ) „საჯარო სამსახურის შესახებ“ საქართველოს კანონის, „საჯარო სამსახურში კონკურსის ჩატარების წესის შესახებ“ საქართველოს მთავრობის 2017 წლის 21 აპრილის №204 დადგენილების ან/და საქართველოს შრომის კოდექსისა და ამ დებულების შესაბამისად, ნიშნავს (მათ შორის, კონკურსის წესით) და ათავისუფლებს ბიუროს თანამშრომლებს, აფორმებს შრომით ხელშეკრულებებს;“;

„ლ) ამტკიცებს ბიუროს საშტატო ნუსხას, შრომის ანაზღაურების ოდენობასა და სახელფასო ფონდს;“;

„პ) სხვადასხვა სამართალურთიერთობის რეგულირების მიზნით,  ამტკიცებს ბიუროს შინაგანაწესს, განსაზღვრავს თანამშრომელთა ფუნქციებს და, საჭიროების შემთხვევაში, ამტკიცებს სამსახურის თანამშრომელთა საკვალიფიკაციო მოთხოვნებს;“;

„ს) ამტკიცებს ბიუროს ექსპერტების ტანსაცმლის ფორმისა და ბიუროს თანამშრომლის სამსახურებრივი მოწმობის ნიმუშებს;“.

2. მე-4 მუხლის მე-3 პუნქტს დაემატოს შემდეგი შინაარსის „ფ“ ქვეპუნქტი:

„ფ) უფლებამოსილია, მოახდინოს მისი კომპეტენციისთვის მიკუთვნებული ზოგიერთი საკითხის გადაწყვეტის უფლების დელეგირება ბიუროს უფროსის პირველ მოადგილესა და მოადგილეებზე.“.

3. მე-7 მუხლს დაემატოს შემდეგი შინაარსის „მ“ ქვეპუნქტი:

„მ) ხარისხის კონტროლის და საერთაშორისო ურთიერთობათა დეპარტამენტი.“.

4. მე-10 მუხლის:

ა) „გ“, „თ“, „მ“, „ო“, „პ“, „ჟ“ ქვეპუნქტები ამოღებულ იქნეს;

ბ) „ბ“ და „ლ“ ქვეპუნქტები ჩამოყალიბდეს შემდეგი რედაქციით:

„ბ) ბიუროს ურთიერთობების კოორდინაცია სხვადასხვა სახელმწიფო დაწესებულებასთან, საჯარო და კერძო სამართლის იურიდიულ პირებთან;“;

 „ლ) ბიუროს შინაგანაწესის შემუშავება და, მოქმედი კანონმდებლობის შესაბამისად, ცვლილებებისა და წინადადებების მომზადება;“.

5. მე-11 მუხლს დაემატოს  შემდეგი შინაარსი „ი“ ქვეპუნქტი:

„ი) ბიუროს თანამშრომელთა შრომისა და საშემსრულებლო დისციპლინის, შინაგანაწესისა და ეთიკის ნორმების მოთხოვნათა დაცვაზე კონტროლი.“.

6. დაემატოს შემდეგი შინაარსის 21² მუხლი:

„მუხლი 21²

ხარისხის კონტროლის და საერთაშორისო ურთიერთობათა დეპარტამენტის ამოცანებია:

ა) ბიუროს ურთიერთობების კოორდინაცია სხვადასხვა სახელმწიფო დაწესებულებასთან, საჯარო და კერძო სამართლის იურიდიულ პირებთან, საერთაშორისო ორგანიზაციებსა და საქართველოში აკრედიტებულ დიპლომატიურ წარმომადგენლობებთან, კომპეტენციის ფარგლებში;

ბ) საქართველოსა და საერთაშორისო საექსპერტო დაწესებულებებთან, ორგანიზაციებსა და საერთაშორისო ექსპერტებთან თანამშრომლობა,  კომპეტენციის ფარგლებში;

გ) ბიუროს თანამშრომელთა მომზადების, გადამზადებისა და კვალიფიკაციის ამაღლების მიზნით, წინადადებების/რეკომენდაციის შემუშავება და ხელმძღვანელობასთან წარდგენა (ბიუროს სტრუქტურული დანაყოფების/ტერიტორიული ორგანოების ხელმძღვანელებთან  კოორდინაციით), ორგანიზაციული საკითხების უზრუნველყოფა;

დ) საერთაშორისო სტანდარტების შესაბამისად, საექსპერტო ლაბორატორიების მართვის სისტემის დანერგვა (სტრუქტურული დანაყოფების/ტერიტორიული ორგანოების ხელმძღვანელებთან კოორდინაციით);

ე) საექსპერტო საქმიანობის სფეროში დანერგილი თანამედროვე კვლევითი მეთოდების შესწავლა და ბიუროში მათი დანერგვისათვის საჭირო რესურსების შექმნა;

ვ) სხვა ქვეყნების საექსპერტო სამსახურებთან ურთიერთობების დამყარება და დონორ ორგანიზაციებთან ურთიერთობების კოორდინირება;

ზ) საერთაშორისო კონფერენციების, ტრენინგებისა და სემინარების დაგეგმვა და ორგანიზება;

თ) საერთაშორისო სტანდარტების შესაბამისი სამოქმედო პროცედურების შემუშავება, დანერგვა და პერიოდული განახლება, ხარისხის სისტემის წლიური შემოწმება და შესაბამისი ანგარიშის მომზადება;

ი) ბიუროს ხელმძღვანელობის სხვა დავალებებისა და მითითებების შესრულება.“.