ბრძანებულება საქართველოს სსრ უმაღლესი საბჭოს პრეზიდიუმისა საქართველოს სსრ სისხლის სამართლის და სისხლის სამართლის საპროცესო კოდექსებში დამატებათა და ცვლილებათა შეტანის შესახებ

ბრძანებულება საქართველოს სსრ უმაღლესი საბჭოს პრეზიდიუმისა

საქართველოს სსრ სისხლის სამართლის და სისხლის სამართლის საპროცესო კოდექსებში დამატებათა და ცვლილებათა შეტანის შესახებ

„ვალუტის მცირე რაოდენობით შესყიდვის, გაყიდვისა და  გაცვლისათვის და უცხოელთაგან ნივთების შესყიდვებისათვის პასუხისმგებლობის შესახებ“ სსრ კავშირის უმაღლესი საბჭოს პრეზიდიუმის 1970 წლის 25 მარტის ბრძანებულების შესაბამისად, საქართველოს სსრ უმაღლესი საბჭოს პრეზიდიუმი ადგენს:

1. დაემატოს საქართველოს სსრ სისხლის სამართლის კოდექსის 165² მუხლი შემდეგი შინაარსისა:

„მუხლი 165². ვალუტის ან ფასიანი ქაღალდის მცირე რაოდენობით შესყიდვა, გაყიდვა და გაცვლა

ვალუტის ან ფასიანი ქაღალდის მცირე რაოდენობით შესყიდვა, გაყიდვა და გაცვლა, ჩადენილი იმ პირის მიერ, რომლის მიმართაც ამავე ქმედობისათვის ერთი წლის განმავლობაში ორჯერ იყო გამოყენებული ადმინისტრაციული ზემოქმედების ღონისძიება, –

ისჯება თავისუფლების აღკვეთით ვადით ერთ წლამდე ან გამასწორებელი სამუშაოებით იმავე ვადით, სავალუტო ფასეულობის კონფისკაციით“.

2. დადგინდეს, რომ საქართველოს სსრ სისხლის სამართლის კოდექსის 165² მუხლით გათვალისწინებულ დანაშაულთა საქმეებზე წარმოებს მოკვლევა, ხოლო იმ შემთხვევაში, თუ სასამართლო არ პროკურორი საჭიროდ მიიჩნევს – წინასწარი გამოძიება.

ამის შესაბამისად საქართველოს სსრ სისხლის სამართლის საპროცესო კოდექსის 126-ე მუხლის პირველ ნაწილს ციფრის 138 შემდეგ დაემატოს ციფრი 165².

საქართველოს სსრ უმაღლესი საბჭოს პრეზიდიუმის თავმჯდომარე     გ. ძოწენიძე.

საქართველოს სსრ უმაღლესი საბჭოს პრეზიდიუმის მდივანი ზ. კვაჭაძე.

თბილისი, 1970 წლის 30 ივნისი.