„ეკონომიკური საბჭოს შემადგენლობის, უფლებამოსილებისა და საქმიანობის წესის განსაზღვრის თაობაზე“ საქართველოს მთავრობის 2022 წლის 26 დეკემბრის №592 დადგენილებაში ცვლილების შეტანის შესახებ

1. დადგენილების:

ა) პირველი მუხლი ჩამოყალიბდეს შემდეგი რედაქციით:

„მუხლი 1. „საქართველოს მთავრობის სტრუქტურის, უფლებამოსილებისა  და საქმიანობის წესის შესახებ“ საქართველოს კანონის მე-5  მუხლის „თ“  −  „კ“ ქვეპუნქტების, მე-6 მუხლის პირველი პუნქტისა და   29-ე მუხლის საფუძველზე, ქვეყნის ეკონომიკური პოლიტიკისა და ეკონომიკური სტრატეგიის შემუშავებისა და დაგეგმვის კოორდინაციის მიზნით, განისაზღვროს  ეკონომიკური საბჭოს (შემდგომში – საბჭო) შემადგენლობა:

1. საქართველოს პრემიერ-მინისტრი − საბჭოს თავმჯდომარე.

2. საქართველოს პრემიერ-მინისტრის მთავარი მრჩეველი ეკონომიკურ საკითხებში – საბჭოს მდივანი.

3. საქართველოს  ეკონომიკისა  და  მდგრადი  განვითარების მინისტრი – საბჭოს წევრი.

4. საქართველოს ფინანსთა მინისტრი – საბჭოს წევრი.

5. საქართველოს რეგიონული განვითარების მინისტრი – საბჭოს წევრი.

6. საქართველოს ინფრასტრუქტურის მინისტრი – საბჭოს წევრი.

7. საქართველოს გარემოს დაცვისა და სოფლის მეურნეობის მინისტრი − საბჭოს წევრი.

8. საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი – საბჭოს წევრი.

9. საქართველოს სახელმწიფო უსაფრთხოების სამსახურის უფროსი − საბჭოს წევრი.

10. საქართველოს მთავრობის ადმინისტრაციის უფროსი − საბჭოს წევრი.“;

ბ) 1¹ მუხლი ჩამოყალიბდეს შემდეგი რედაქციით:

„მუხლი 1¹. საბჭოს მუშაობაში, საკითხის შინაარსიდან გამომდინარე, მონაწილეობის მიღება ეთხოვოთ საქართველოს მთავრობის წევრებს, საქართველოს პარლამენტის წევრებს, მუნიციპალიტეტების მერებს, საქართველოს ბიზნესომბუდსმენს და სხვა ადმინისტრაციული ორგანოს ხელმძღვანელ პირებს.“.

2. დადგენილებით დამტკიცებული „ეკონომიკური საბჭოს დებულების“:

ა) მე-3 მუხლი ჩამოყალიბდეს შემდეგი რედაქციით:

„მუხლი 3. საბჭოს მოწვეული წევრები

საქართველოს მთავრობის დადგენილებით განსაზღვრული საბჭოს წევრების გარდა, საქართველოს პრემიერ-მინისტრის გადაწყვეტილებით, საბჭოს სხდომაზე შეიძლება, მოწვეულ იქნენ ადმინისტრაციული ორგანოსა და  კერძო სამართლის იურიდიული პირების წარმომადგენლები.“;

ბ) მე-5 მუხლი ჩამოყალიბდეს შემდეგი რედაქციით:

„მუხლი 5. საბჭოს საქმიანობის უზრუნველყოფა

1. საბჭოს ორგანიზაციულ-ფინანსურ მხარდაჭერას უზრუნველყოფს საქართველოს მთავრობის ადმინისტრაცია.

2. საბჭოს მდივნის საქმიანობა შესაძლოა, იყოს ანაზღაურებადი.“.