„საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – აღსრულების ეროვნული ბიუროს დებულების დამტკიცების შესახებ“ საქართველოს იუსტიციის მინისტრის 2014 წლის 6 მაისის №24 ბრძანებაში ცვლილების შეტანის თაობაზე

1. 23-ე მუხლი ჩამოყალიბდეს შემდეგი რედაქციით:

„მუხლი 23. აღსრულების ეროვნული ბიუროს სტრუქტურული ერთეულებისა და ტერიტორიული ორგანოების ხელმძღვანელობა

აღსრულების ეროვნული ბიუროს სტრუქტურულ ერთეულს (გარდა აღსრულების პოლიციის სამმართველოსი) ხელმძღვანელობს დეპარტამენტის უფროსი, აღსრულების პოლიციის სამმართველოს − სამმართველოს უფროსი, ხოლო აღსრულების ეროვნული ბიუროს ტერიტორიული ორგანოს – სააღსრულებო ბიუროს − ბიუროს უფროსი. დეპარტამენტის უფროსს და აღსრულების პოლიციის სამმართველოს უფროსს შეიძლება ჰყავდეს მოადგილე.“.

2. 24-ე მუხლს:

ა) დაემატოს შემდეგი შინაარსის 1¹ პუნქტი:

„1¹. დეპარტამენტის უფროსის მოადგილე:

ა) განსაზღვრავს მის უფლებამოსილებას მიკუთვნებულ საკითხებთან დაკავშირებით პრიორიტეტებს, უწევს კოორდინაციას და აკონტროლებს მათ შესრულებას;

ბ) ხელს უწყობს დეპარტამენტის უფროსს დეპარტამენტის მართვაში;

გ) ვიზირებას უკეთებს დეპარტამენტში მომზადებულ დოკუმენტებს, პასუხისმგებელია მათი შესრულების ხარისხსა და სისწორეზე;

დ) კომპეტენციის ფარგლებში ზედამხედველობს დეპარტამენტის თანამშრომლების მიერ სამსახურებრივი მოვალეობის ჯეროვნად შესრულებასა და დისციპლინის დაცვას;

ე) კომპეტენციის ფარგლებში ანგარიშვალდებულია აღსრულების ეროვნული ბიუროს თავმჯდომარის, კურატორი მოადგილისა (ასეთის არსებობის შემთხვევაში) და დეპარტამენტის უფროსის  წინაშე; ასრულებს მათ დავალებებს.“;

ბ) დაემატოს შემდეგი შინაარსის მე-3 და მე-4 პუნქტები:

„3. დეპარტამენტის უფროსის არყოფნის ან მის მიერ უფლებამოსილების განხორციელების შეუძლებლობის შემთხვევაში, მის მოვალეობას აღსრულების ეროვნული ბიუროს თავმჯდომარის ბრძანებით ასრულებს დეპარტამენტის უფროსის მოადგილე ან დეპარტამენტში შემავალი ერთ-ერთი სამსახურის უფროსი, ხოლო მათი არარსებობისას – დეპარტამენტის ერთ-ერთი თანამშრომელი.

4. სამსახურის უფროსის არყოფნის ან მის მიერ უფლებამოსილების განხორციელების შეუძლებლობის შემთხვევაში, მის მოვალეობას აღსრულების ეროვნული ბიუროს თავმჯდომარის ბრძანებით ასრულებს ამავე სამსახურის ერთ-ერთი თანამშრომელი.“.