„ელექტროენერგიის (სიმძლავრის) ბაზრის წესების დამტკიცების შესახებ“ საქართველოს ენერგეტიკის მინისტრის 2006 წლის 30 აგვისტოს №77 ბრძანებაში ცვლილებების შეტანის თაობაზე

1. 48-ე მუხლის მე-4 პუნქტი ჩამოყალიბდეს შემდეგი რედაქციით:

„4. დისპეტჩერიზაციის ლიცენზიატს უფლება აქვს, სამინისტროსთან შეთანხმებით, ამ მუხლის პირველი პუნქტით გათვალისწინებული ელექტროენერგიის მოცულობის ანაზღაურება მეზობელი ქვეყნის ენერგოსისტემისთვის უზრუნველყოს მომდევნო უახლოეს შესაძლებელ საანგარიშო პერიოდში, საქართველოს ელექტროენერგეტიკულ სისტემაში არსებული ოპერირების რეჟიმების გათვალისწინებით, მეზობელი ქვეყნის ენერგოსისტემის ტექნიკურ ოპერატორთან შეთანხმების საფუძველზე, იმავე მოცულობის ელექტროენერგიის მეზობელი ქვეყნის ენერგოსისტემისთვის ექსპორტის ხელშეკრულების გარეშე დაბრუნების (გატანის) გზით.“.

2. 48-ე მუხლის შემდეგ დაემატოს 48¹ მუხლი:

„მუხლი 48¹. გამონაკლის შემთხვევებში მეზობელ ქვეყანაში ავარიული სიტუაციის აღმოფხვრის, მეზობელი ქვეყნის ენერგოსისტემის სტაბილიზაციისა და უსაფრთხოების შენარჩუნების მიზნით, დისპეტჩერიზაციის ლიცენზიატის მიერ ელექტროენერგიის ექსპორტის ხელშეკრულების გარეშე მეზობელ ქვეყნაში გატანილი ელექტროენერგიის დაბრუნების დროებითი წესი

1. მეზობელ ქვეყანაში ავარიული სიტუაციის აღმოფხვრის, მეზობელი ქვეყნის ენერგოსისტემის სტაბილიზაციისა და უსაფრთხოების შენარჩუნების მიზნით, ამ წესების 14² მუხლის მე-10 პუნქტის შესაბამისად დისპეტჩერიზაციის ლიცენზიატის მიერ ელექტროენერგიის ექსპორტის ხელშეკრულების გარეშე საქართველოს ენერგოსისტემიდან გატანილი ელექტროენერგიის ის მოცულობა, რომლის დაბრუნება შესაბამისი მეზობელი ქვეყნის (თურქეთი) ენერგოსისტემიდან იმავე საანგარიშო პერიოდში ვერ განხორციელდა, წარმოადგენს დისპეჩერიზაციის ლიცენზიატის მიერ შესყიდულ საბალანსო ელექტროენერგიას.

2. ამ მუხლის პირველი პუნქტით განსაზღვრულ შემთხვევაში, მეზობელი ქვეყნის ენერგოსისტემაში ექსპორტის ხელშეკრულების გარეშე გატანილი ელექტროენერგიის იმ მოცულობას, რომლის დაბრუნება შესაბამისი მეზობელი ქვეყნის (თურქეთი) ენერგოსისტემიდან იმავე საანგარიშო პერიოდში ვერ განხორციელდა, დისპეტჩერიზაციის ლიცენზიატი ელექტროენერგეტიკული ბაზრის ოპერატორისგან შეისყიდის ამ წესების მე-14 მუხლის მე-3 პუნქტით განსაზღვრული ფასით.

3. დისპეტჩერიზაციის ლიცენზიატი ელექტროენერგეტიკული ბაზრის ოპერატორთან ამ მუხლის პირველი პუნქტით განსაზღვრულ ელექტროენერგიაზე ანგარიშსწორებას ახორციელებს ამ მუხლის მე-2 პუნქტით განსაზღვრული ფასით.

4. დისპეტჩერიზაციის ლიცენზიატს უფლება აქვს, სამინისტროსთან შეთანხმებით, ამ მუხლის პირველი პუნქტით გათვალისწინებული ელექტროენერგიის მოცულობის დაბრუნება მეზობელი ქვეყნის ენერგოსისტემიდან უზრუნველყოს მომდევნო უახლოეს შესაძლებელ საანგარიშო პერიოდში,  საქართველოს ელექტროენერგეტიკულ სისტემაში არსებული ოპერირების რეჟიმების გათვალისწინებით, მეზობელი ქვეყნის ენერგოსისტემის ტექნიკურ ოპერატორთან შეთანხმების საფუძველზე, იმავე მოცულობის ელექტროენერგიის მეზობელი ქვეყნის ენერგოსისტემიდან იმპორტის ხელშეკრულების გარეშე დაბრუნების (შემოტანის) გზით.

5. ამ მუხლის მე-4 პუნქტით განსაზღვრული ელექტროენერგია ამ წესების მე-14 მუხლის მე-3 პუნქტით გათვალისწინებული საბალანსო ელექტროენერგიის ფასის ფორმირებაში მონაწილეობს იმ ჰიდროელექტროსადგურის ტარიფის ზედა ზღვრით, რომელსაც კომისიამ დაუდგინა ყველაზე მაღალი ტარიფი.“.