„ფსიქოტროპული მედიკამენტებისა და სპეციალურ კონტროლს დაქვემდებარებულ ფარმაცევტულ პროდუქტთან გათანაბრებული სამკურნალო საშუალებების გამოსაწერი ფორმა №2 ელექტრონული რეცეპტის ბრუნვის წესის დამტკიცების თაობაზე“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის 2022 წლის 8 აპრილის №01-31/ნ ბრძანებაში ცვლილების შეტანის შესახებ

ა) მე-3 მუხლს მე-9 პუნქტის შემდეგ დაემატოს შემდეგი შინაარსის 9¹-9⁴ პუნქტები:

„9¹. რეცეპტის გამომწერი ექიმი ვალდებულია:

ა) უზრუნველყოს, რომ პაციენტზე გამოწერილი ფარმაცევტული პროდუქტის სადღეღამისო დოზა არ აღემატებოდეს ამ ფარმაცევტული პროდუქტის ინსტრუქციით დადგენილ მაქსიმალურ დღიურ დოზას;

ბ) სამედიცინო დოკუმენტაციაში ყოველი ინდივიდუალური შემთხვევისთვის კონკრეტულად დაასაბუთოს  ფარმაცევტული პროდუქტის დანიშვნის აუცილებლობა;

გ) სრულწლოვანი პაციენტის შემთხვევაში ერთჯერადად არ გამოწეროს ფარმაცევტული პროდუქტის 14 სადღეღამისო დოზაზე მეტი, ხოლო 18 წლამდე ასაკის პაციენტის შემთხვევაში – 30  სადღეღამისო დოზაზე მეტი;

დ) თითოეულ ფარმაცევტულ პროდუქტზე (აქტიურ ნივთიერებაზე) ახალი რეცეპტი გამოწეროს, მხოლოდ იმ შემთხვევაში, თუ პაციენტს დარჩენილი აქვს იმავე ფარმაცევტული პროდუქტის (აქტიური ნივთიერების)  არაუმეტეს 5 სადღეღამისო დოზის მარაგი;

ე) არ გამოწეროს რეცეპტი, თუ ელექტრონულ სისტემაში პაციენტს პარალელურად უფიქსირდება სხვა ექიმის მიერ გამოწერილი იგივე ფარმაცევტული პროდუქტის (აქტიური ნივთიერების) რეცეპტი და 5 სადღეღამისო დოზაზე მეტი მარაგი;

ვ) ფარმაცევტული პროდუქტის (აქტიური ნივთიერების) დოზის ცვლილების აუცილებლობის შემთხვევაში, გამოწეროს ახალი რეცეპტი, უკვე გამოწერილი ფარმაცევტული პროდუქტის რაოდენობის გათვალისწინებით და ამ პუნქტის „დ“ და „ე“ ქვეპუნქტების მხედველობაში მიღებით.

9². რეალიზებული ფარმაცევტული პროდუქტის დაკარგვის, დაზიანების ან განადგურების შემთხვევაში, ექიმი უფლებამოსილია, პაციენტის/მისი კანონიერი წარმომადგენლის/მინდობილობით აღჭურვილი პირის წერილობითი ახსნა-განმარტების საფუძველზე, გამოწეროს დაკარგულ/დაზიანებულ/განადგურებულ ფარმაცევტულ პროდუქტზე (აქტიურ ნივთიერებაზე) რეცეპტი ყოველდღიურად, 1 სადღეღამისო დოზის ოდენობით (უქმე და დასვენების დღეების გათვალისწინებით, შესაძლებელია, გამოიწეროს შესაბამისი რაოდენობის დოზა მომდევნო სამუშაო დღის დოზამდე), მაგრამ არაუმეტეს დაკარგული/დაზიანებული/განადგურებული ფარმაცევტული პროდუქტის (აქტიური ნივთიერების) ჯამური რაოდენობისა.

9³. პაციენტის/კანონიერი წარმომადგენლის/მინდობილობით აღჭურვილი პირის  მიერ რეცეპტის საფუძველზე რეალიზებული ფარმაცევტული პროდუქტის განმეორებით დაკარგვის/დაზიანების/განადგურების შემთხვევაში, ექიმს წერილობით ახსნა-განმარტებასთან ერთად, უნდა წარედგინოს, აღნიშნულ ფაქტთან დაკავშირებით, სამართალდამცავი ორგანოებისთვის მიმართვის დამადასტურებელი დოკუმენტი.

9⁴. ამ მუხლის 9² და 9³ პუნქტებით გათვალისწინებული შემთხვევების დადგომისას, ექიმი/სამედიცინო დაწესებულება ვალდებულია აღნიშნულის თაობაზე წერილობით აცნობოს სამინისტროს, პაციენტის ვიზიტიდან არაუგვიანეს 5 სამუშაო დღის ვადაში.“.

ბ) მე-4 მუხლს მე-9 პუნქტის შემდეგ დაემატოს შემდეგი შინაარსის 9¹ პუნქტი:

„9¹. რეალიზატორს არ აქვს უფლება ერთი რეცეპტის ფარგლებში გასცეს ფარმაცევტული პროდუქტი სრულწლოვანი პაციენტის შემთხვევაში 14 სადღეღამისო დოზაზე მეტი, ხოლო 18 წლამდე ასაკის პაციენტის შემთხვევაში – 30  სადღეღამისო დოზაზე მეტი.“.