„საქართველოსა და აზიის განვითარების ბანკს შორის სასესხო შეთანხმება (ჩვეულებრივი ოპერაციები) (პროგრამა ადგილობრივ დონეზე თანაბარი ხელმისაწვდომობის შესახებ სტანდარტის შესაბამის (CLEAR) წყალზე)“

წინამდებარე სასესხო შეთანხმება, დათარიღებული 2025 წლის 3 ნოემბრით საქართველოსა (შემდგომში „მსესხებელი“) და აზიის განვითარების ბანკს (შემდგომში „ADB“) შორის,

სადაც,

(A) მსესხებელმა მიმართა ADB-ს სესხის გამოყოფის თაობაზე, წინამდებარე სასესხო შეთანხმების 1-ელ განრიგში აღწერილი პროგრამის მიზნებისათვის;

(B) პროგრამას განახორციელებს საქართველოს ინფრასტრუქტურის სამინისტრო („MOI“) და შესრულდება სახელმწიფოს საკუთრებაში არსებული შპს „საქართველოს გაერთიანებული წყალმომარაგების კომპანიის“ („UWSCG“) მიერ და ამ მიზნითვ მსესხებელი ხელმისაწვდომს გახდის MOI-სთვის და UWSCG-სთვის წინამდებარე შეთანხმების შესაბამისად გამოყოფილ სესხის თანხებს ADB-სთვის დამაკმაყოფილებელი პირობებით; და

(C) ADB თანახმაა გასცეს სესხი მსესხებელზე ADB-ის ჩვეულებრივი კაპიტალური რესურსებიდან, წინამდებარე შეთანხმებით გათვალისწინებული ვადებისა და პირობების შესაბამისად;

ამგვარად, მხარეები თანხმდებიან შემდეგზე:

მუხლი I

სასესხო რეგულაციები; განმარტებები

პუნქტი 1.01. ADB-ის 2022 წლის 1 იანვრით დათარიღებული ჩვეულებრივი ოპერაციებისათვის განსაზღვრული სასესხო რეგულაციების („სასესხო რეგულაციები“) ყველა დებულება ვრცელდება წინამდებარე სასესხო შეთანხმებაზე იმავე ძალითა და ეფექტით, როგორიც მას ექნებოდა წინამდებარე დოკუმენტში სრულად ასახვის შემთხვევაში, შემდეგი ცვლილებების გათვალისწინებით:

(a) პუნქტი 2.01 (qq) ამოღებულია და შეცვლილია შემდეგით:

ტერმინი „პროგრამა“ ნიშნავს პროგრამას, რომლისთვისაც ADB დათანხმდა სესხის გაცემას, როგორც ეს აღწერილია სასესხო შეთანხმებაში და იმის გათვალისწინებით, რომ ხსენებულ აღწერილობაში შეიძლება დროდადრო ცვლილებების შეტანა ADB-სა და მსესხებელს შორის შეთანხმების საფუძველზე.

(b) ტერმინი „პროექტი“, სადაც არ უნდა იყოს იგი გამოყენებული სასესხო რეგულაციების ფარგლებში, უნდა შეიცვალოს ტერმინით „პროგრამა“

(c) პუნქტი 2.01(ss) ამოღებულია და ჩანაცვლებულია შემდეგით:

ტერმინი „პროგრამის აღმასრულებელი უწყება“ ნიშნავს ორგანიზაციას ან ორგანიზაციებს, რომლებიც პასუხისმგებელნი არიან პროგრამის განხორციელებაზე, როგორც ეს არის აღწერილი სასესხო შეთანხმებაში.

(d) სასესხო რეგულაციებით გათვალისწინებული ტერმინი „პროექტის აღმასრულებელი უწყება“ უნდა ჩანაცვლდეს ტერმინით „პროგრამის აღმასრულებელი უწყება“.

პუნქტი 1.02. წინამდებარე სასესხო შეთანხმებაში გამოყენებულ, სასესხო რეგულაციებში განმარტებულ რამდენიმე ტერმინს აქვთ იგივე მნიშვნელობა, რაც განსაზღვრულია სასესხო რეგულაციებში, თუ წინამდებარე შეთანხმებაში არ მოხდა მათი შეცვლა ან კონტექსტიდან სხვა რამ არ გამომდინარეობს. წინამდებარე სასესხო შეთანხმებაში გამოყენებულ დამატებით ტერმინებს აქვს შემდეგი მნიშვნელობა:

(a) „ანტიკორუფციული სახელმძღვანელო პრინციპები“ ნიშნავს ADB-ის სახელმძღვანელო პრინციპებს, რომელთა მიზანია თაღლითობის, კორუფციისა და სხვა აკრძალული ქმედებების პრევენცია ან შემცირება პროგრამების შედეგებზე ორიენტირებული დაფინანსების ფარგლებში, როგორც ეს მოცემულია PID-ის 1-ელ განრიგში;

(b) „სადეპოზიტო ანგარიში“ ნიშნავს წინამდებარე სასესხო შეთანხმების მე-3 განრიგის მე-2 პუნქტში მითითებულ ანგარიშს;

(c) „DLI“ ნიშნავს თითოეულ ათვისებაზე მიბმულ ინდიკატორს, როგორც ეს მითითებულია DLI მატრიცაში;

(d) „ათვისებაზე მიბმული ინდიკატორების (DLI) მატრიცა“ ნიშნავს პროგრამის DLI მატრიცას, რომელიც მოცემულია წინამდებარე სასესხო შეთანხმების მე-3 განრიგის მე-2 დანართში, მისი პერიოდული განახლებებით მსესხებლისა და ADB-ის მიერ;

(e) „DLI-ის ვერიფიკაციის პროტოკოლი“ ნიშნავს მსესხებლის მიერ თითოეული DLI-ის მიღწევის გადამოწმების წესს, როგორც ეს მოცემულია PID-ში;

(f) „სათანადო ხარჯები“ ნიშნავს იმ სათანადო ხარჯებს, რომლებიც მოხსენიებულია წინამდებარე სასესხო შეთანხმების მე-4 განრიგის მე-2 პუნქტში;

(g) „გარემოსდაცვითი გარანტიები“ ნიშნავს იმ ამოცანებსა და პოლიტიკის პრინციპებს, რომლებიც აღწერილია SPS-ის  V თავში;

(h) „ფისკალური წელი“ ნიშნავს მსესხებლის ფისკალურ წელს, რომელიც იწყება ყოველი წლის 1 იანვარს და სრულდება 31 დეკემბერს;

(i) „საქართველოს ხედვა 2030“ ნიშნავს ხედვა 2030 საქართველოს განვითარების სტრატეგიას, რომლის დროისა და წყლის სექტორის სპეციფიკურ კომპონენტებს მხარს უჭერს პროგრამა;

(j) „მაღალი ღირებულების ხელშეკრულებები“ ნიშნავს:

i. სამუშაოების, სრული პაკეტისა და მიწოდება-მონტაჟის ხელშეკრულებებს, რომელთა ღირებულება თითოეული ხელშეკრულების შემთხვევაში შეადგენს ან აღემატება $50 მილიონს; საქონლის შესყიდვის ხელშეკრულებებს, რომელთა ღირებულება, თითოეული ხელშეკრულების შემთხვევაში შეადგენს ან აღემატება $30 მილიონს; საინფორმაციო ტექნოლოგიების ან არასაკონსულტაციო მომსახურების ხელშეკრულებებს, რომელთა ღირებულება თითოეული ხელშეკრულების შემთხვევაში შეადგენს ან აღემატება $20 მილიონს; საკონსულტაციო მომსახურების ხელშეკრულებებს, რომელთა ღირებულება თითოეული ხელშეკრულების შემთხვევაში შეადგენს ან აღემატება $15 მილიონს;

(k) „მკვიდრი მოსახლეობის გარანტიები“ ნიშნავს მიზნებსა და პოლიტიკის პრინციპებს, რომლებიც განსაზღვრულია SPS-ის მეხუთე თავში;

(l) „იძულებითი განსახლების გარანტიები“ ნიშნავს იმ ამოცანებსა და პოლიტიკის პრინციპებს, რომლებიც აღწერილია SPS-ის  V თავში;

(m) „სესხის ჩამორიცხვის სახელმძღვანელო“ ნიშნავს ADB-ის სესხის ჩამორიცხვის სახელმძღვანელოს (2022 წლის ვერსია, მასში პერიოდულად შეტანილი ცვლილებებით);

(n) „PID“ ნიშნავს პროგრამის განხორციელების დოკუმენტს, რომელიც დათარიღებულია 2025 წლის 11 სექტემბრით და რომელიც პერიოდულად განახლდება მსესხებლისა და ADB-ის მიერ;

(o) „პროგრამის სამოქმედო გეგმა“ ან „PAP“ ნიშნავს პროგრამის სამოქმედო გეგმას, რომელიც დათარიღებულია 2025 წლის 11 აგვისტოთი და რომელიც პერიოდულად განახლდება მსესხებლისა და ADB-ის მიერ;

(p) „პროგრამის ღონისძიებები“ ნიშნავს ღონისძიებებს, რომლებიც განსაზღვრულია პროგრამის სამოქმედო გეგმაში;

(q) „პროგრამის დასრულების თარიღი“ ნიშნავს თარიღს, რომელიც მითითებულია წინამდებარე სასესხო შეთანხმების 1-ელი განრიგის მე-3 პუნქტში ან სხვა ისეთ თარიღს, რომელთან დაკავშირებითაც შეთანხმდებიან მსესხებელი და ADB;

(r) „პროგრამის აღმასრულებელი უწყება“ ან „EA“ სასესხო რეგულაციების მიზნებისა და შინაარსისთვის, ნიშნავს MOI-ს ან მის შესაძლო უფლებამონაცვლეს, რომელიც მისაღებია ADB-თვის და პასუხს აგებს პროგრამის მიმდინარეობაზე;

(s) „პროგრამის განმახორციელებელი უწყება“ ან „IA“ სასესხო რეგულაციების მიზნებისა და შინაარსისთვის, ნიშნავს UWSCG-ს ან მის შესაძლო უფლებამონაცვლეს, რომელიც მისაღებია ADB-თვის და პასუხს აგებს პროგრამის განხორციელებაზე;

(t) „PSSA“ ნიშნავს პროგრამის საგარანტიო სისტემის შეფასებას, მათ შორის, მის ნებისმიერ განახლებას, რომელსაც ამზადებს და წარადგენს პროგრამის განმახორციელებელი უწყება და ამტკიცებს ADB;

(u) „SPS“ – ნიშნავს ADB-ის საგარანტიო პოლიტიკას (2009); და

(v) „ცხრილი“ ნიშნავს სასესხო თანხების გამოყოფისა და გამოთხოვის ცხრილს, რომელიც მოცემულია წინამდებარე სასესხო შეთანხმების მე-3 განრიგის დანართ 1-ში.

მუხლი II

სესხი

პუნქტი 2.01. (a) ADB თანახმაა ADB-ის ჩვეულებრივი კაპიტალური რესურსებიდან გასცეს სესხი მსესხებელზე ორასი მილიონი ევროს (€200,000,000) ოდენობით, იმის გათვალისწინებით, რომ ხსენებული თანხა შესაძლოა დროდადრო კონვერტირებულ იქნეს ვალუტის კურსის მიხედვით, წინამდებარე სასესხო შეთანხმების 2.06 პუნქტში მოცემული დებულებების შესაბამისად.

(b) სესხის ძირითადი თანხის დაფარვის ვადა შეადგენს 14.5 წელს, ხოლო საშეღავათო პერიოდი განსაზღვრულია წინამდებარე პუნქტის (c) ქვეპუნქტში.

(c) ტერმინი „საშეღავათო პერიოდი“, რომელიც გამოყენებულია ამ პუნქტის (b) ქვეპუნქტში, გულისხმობს პერიოდს, სესხის ძირითადი თანხის პირველი გადახდის თარიღამდე, ამორტიზაციის გრაფიკის შესაბამისად, რომელიც მოცემულია წინამდებარე სასესხო შეთანხმების მე-2 განრიგში.

პუნქტი 2.02. მსესხებელი გადაუხდის ADB-ს პროცენტს ათვისებულ და დაუბრუნებელ სესხის თანხაზე დროდადრო თითოეულ საპროცენტო პერიოდში, განაკვეთით, რომელიც ტოლია შემდეგ საკრებთა ჯამისა:

(a) Euribor;

(b) 0.60%, როგორც ეს განსაზღვრულია სასესხო რეგულაციების 3.02 პუნქტში, და გამოკლებული კრედიტი 0.10%-ის ოდენობით,  როგორც ეს სასესხო რეგულაციების 3.03 პუნქტშია განსაზღვრული; და

(c) სესხის დაფარვის ვადიანობის პრემია 0.30%, როგორც ეს სასესხო რეგულაციების 3.03 პუნქტით არის განსაზღვრული.

პუნქტი 2.03. მსესხებელმა უნდა გადაიხადოს ვალდებულების გადასახდელი წელიწადში 0.15%-ის ოდენობით. ასეთი საურავი უნდა დაირიცხოს სესხის მთლიან თანხაზე (გარდა დროდადრო ათვისებული თანხებისა), დაწყებული წინამდებარე სასესხო შეთანხმების ხელმოწერის თარიღიდან 60 დღის შემდეგ.

პუნქტი 2.04. სესხზე დარიცხული პროცენტი ან ნებისმიერი სხვა სახის საკომისიოები გადახდილი უნდა იყოს წელიწადში ორჯერ, ყოველი წლის 15 აპრილსა და 15 ოქტომბერს.

პუნქტი 2.05. სასესხო ანგარიშიდან გამოტანილ სესხის ძირითად თანხას მსესხებელი დაფარავს წინამდებარე შეთანხმების მე-2 განრიგში მოცემული დებულებების შესაბამისად.

პუნქტი 2.06. (a) მსესხებელს ნებისმიერ დროს შეუძლია მოითხოვოს სესხის პირობებში შემდეგი ცვლილების შეტანა, რათა ხელი შეუწყოს სესხის გონივრულ მართვას:

(i) სესხის ძირითადი თანხის მთლიანი ან ნაწილობრივი, ათვისებული ან აუთვისებელი ნაწილის სესხის ვალუტის შეცვლა დამტკიცებული ვალუტით;

(ii) ათვისებული და დაუბრუნებელი სესხის ძირითადი ოდენობის მთლიანი ან ნაწილობრივი თანხის საბაზისო ცვალებადი საპროცენტო განაკვეთის ფიქსირებული განაკვეთით ან პირიქით შეცვლა; და

(iii) ათვისებული და დაუბრუნებელი სესხის ძირითადი ოდენობის მთლიანი ან ნაწილობრივი თანხის ცვლად განაკვეთზე ლიმიტების დაწესება, ცვლად განაკვეთზე საპროცენტო განაკვეთის ზედა ზღვრის ან საპროცენტო განაკვეთის ქვედა ზღვრის დადგენის გზით.

(b) წინამდებარე პუნქტის (a) ქვეპუნქტის თანახმად საჭირო ნებისმიერი ცვლილება, რომელიც დადასტურებულია ADB-ის მიერ, განისაზღვრება, როგორც „კონვერტაცია”, როგორც ეს განმარტებულია სასესხო რეგულაციების 2.01 (ე) პუნქტში და ძალაში შედის სასესხო რეგულაციების V მუხლისა და კონვერტაციის სახელმძღვანელო პრინციპების შესაბამისად.

მუხლი III

სასესხო სახსრების გამოყენება

პუნქტი 3.01. მსესხებელმა უნდა უზრუნველყოს სასესხო სახსრების გამოყენება მხოლოდ პროგრამით გათვალისწინებული ხარჯების დასაფინანსებლად, წინამდებარე სასესხო შეთანხმების პირობების შესაბამისად.

პუნქტი 3.02. სასესხო სახსრების გამოთხოვა და გამოყენება უნდა მოხდეს წინამდებარე სასესხო შეთანხმების მე-3 განრიგში მოცემული პირობების შესაბამისად, რომელიც დროდადრო ექვემდებარება ცვლილებას მსესხებელსა და ADB-ს შორის შეთანხმების საფუძველზე.

პუნქტი 3.03. სასესხო რეგულაციების 9.02 პუნქტის მიზნებისთვის სესხის დახურვის თარიღი იქნება 2031 წლის 30 ივნისი, ან ნებისმიერი სხვა თარიღი, რომელიც შეიძლება პერიოდულად შეიცვალოს და განისაზღვროს მსესხებელსა და ADB-ს შორის შეთანხმების საფუძველზე.

მუხლი IV

განსაკუთრებული დებულებები

პუნქტი 4.01. პროგრამის განხორციელებისა და შესრულების პროცესში მსესხებელმა უნდა შეასრულოს ან უზრუნველყოს წინამდებარე სასესხო შეთანხმების მე-4 განრიგში მოცემული ყველა ვალდებულების შესრულება.

პუნქტი 4.02. (a) მსესხებელი ვალდებულია და უზრუნველყოფს, რომ პროგრამის განმახორციელებელმა სააგენტომ: (i) იქონიოს ცალკე ანგარიში (ცალკე საბიუჯეტო ხაზი) და დოკუმენტაცია აღნიშნული პროგრამისთვის; (ii) მოამზადოს პროგრამის წლიური ფინანსური ანგარიშები, ADB-სთვის მისაღები ფინანსური ანგარიშგების სტანდარტების შესაბამისად; (iii) ყოველწლიურად განახორციელებინოს აღნიშნული ფინანსური ანგარიშების აუდიტი დამოუკიდებელ აუდიტორებს, რომელთა კვალიფიკაცია, გამოცდილება და კომპეტენცია მისაღებია ADB-სთვის, აუდიტის ჩატარების სტანდარტების შესაბამისად, რომლებიც მისაღებია ADB-სთვის; (iv) თითოეული მსგავსი აუდიტის შემთხვევაში აუდიტორებს მოამზადებინოს ანგარიში, რომელშიც მოცემული იქნება აუდიტის დასკვნა ფინანსურ ანგარიშებთან და ასევე მენეჯმენტის წერილი (რომელიც განსაზღვრავს პროგრამის შიდა კონტროლის კუთხით არსებულ ნაკლოვანებებს, რომლებიც აღმოჩენილ იქნა აუდიტის მიერ, ასეთის არსებობის შემთხვევაში); და (v) ყოველი შესაბამისი ფისკალური წლის დასრულებიდან არა უგვიანეს 6 თვის ვადაში ADB-ს წარუდგინოს შემოწმებული ფინანსური ანგარიშების, აუდიტის დასკვნებისა და მენეჯმენტის წერილის ასლები, ინგლისურ ენაზე და ასევე აღნიშნულ დოკუმენტებთან და ამ დოკუმენტების აუდიტთან დაკავშირებული ინფორმაცია, დროდადრო ADB-ის გონივრული მოთხოვნის შესაბამისად.

(b) ADB-მ საკუთარ ვებგვერდზე უნდა გაასაჯაროოს პროგრამის შემოწმებული წლიური ფინანსური ანგარიშები და მასთან დაკავშირებული აუდიტის დასკვნები, ADB-ს მიერ აღიშნული დოკუმენტების მიღების დადასტურებიდან 14 დღის ვადაში.

(c) ზემოხსენებულ (a) ქვეპუნქტში მითითებული ყოველწლიური შემოწმებული ფინანსური ანგარიშგების გარდა მსესხებელმა უნდა უზრუნველყოს, რომ პროგრამის განმახორციელებელმა უწყებამ: (i) წარმოადგინოს ყოველწლიური ფინანსური ანგარიშგება, რომელიც მომზადებული იქნება ADB-სთვის მისაღები ფინანსური ანგარიშგების სტანდარტების შესაბამისად; (ii)  ყოველწლიურად განახორციელებინოს ფინანსური ანგარიშების აუდიტი დამოუკიდებელ აუდიტორებს, რომელთა კვალიფიკაცია, გამოცდილება და კომპეტენცია მისაღებია ADB-თვის, აუდიტის საერთაშორისო სტანდარტების ან ეროვნული ეკვივალენტის შესაბამისად, რომელიც მისაღებია ADB-თვის; და (iii)  შესაბამისი ორგანოს დამტკიცებიდან არაუგვიანეს 1 თვის ვადაში ADB-ს წარუდგინოს შემოწმებული ფინანსური ანგარიშების ასლები, ინგლისურ ენაზე და ასევე აღნიშნულ დოკუმენტებთან და ამ დოკუმენტების აუდიტთან დაკავშირებული ინფორმაცია, დროდადრო ADB-ის გონივრული მოთხოვნის შესაბამისად.

(d) მსესხებელმა პროგრამის განმახორციელებელი უწყების მეშვეობით საშუალება უნდა მისცეს ADB-ს, მისივე მოთხოვნის შესაბამისად, წინამდებარე თავის (a)(iii) ან/და (c)(ii) ქვეპუნქტის შესაბამისად დაქირავებულ აუდიტორებთან ერთად, განიხილოს პროგრამის ფინანსური ანგარიში და მსესხებლის ან/და პროგრამის განმახორციელებელი უწყების ფინანსური საქმიანობა, თუ ეს დაკავშირებულია პროგრამასთან და უფლებამოსილება მიანიჭოს და მოსთხოვოს აღნიშნული აუდიტორების წარმომადგენლებს მონაწილეობა მიიღონ აღნიშნულ განხილვებში, ADB-ს მოთხოვნის შესაბამისად. გასათვალისწინებელია, რომ აღნიშნული განხილვები უნდა ჩატარდეს მხოლოდ მსესხებლის უფლებამოსილი წარმომადგენლის თანდასწრებით, გარდა იმ შემთხვევისა თუ მსესხებელთან არ მოხდება სხვაგვარად შეთანხმება.

პუნქტი 4.03. სასესხო რეგულაციების 7.01 და 7.04 პუნქტებში მითითებული ინფორმაციისა და ანგარიშების ფარგლებში, მსესხებელი ვალდებულია პროგრამის განმახორციელებელი უწყების მეშვეობით, ADB-ს წარუდგინოს შემდეგი დოკუმენტები, ან უზრუნველყოს მათი წარდგენა: (a) ნახევარწლიური ანგარიშები პროგრამის განხორციელების შესახებ, მათ შორის DLI-ების შესრულება, პროგრამული ღონისძიებებისა და დასაშვები ხარჯების განხორციელება; და (b) ADB-ის გონივრული მოთხოვნის შემთხვევაში, დამატებითი ინფორმაცია ზემოხსენებულ (a) ქვეპუნქტში აღწერილი ანგარიშებისა და პროგრამის განხორციელების შესახებ.

პუნქტი 4.04. მსესხებელმა შესაძლებლობა უნდა მისცეს ADB-ის წარმომადგენლებს შეამოწმონ პროგრამა, ასევე შესაბამისი ანგარიშები და დოკუმენტაცია.

მუხლი V

ძალაში შესვლა

პუნქტი 5.01. სასესხო რეგულაციების 10.04 პუნქტის მიზნობრიობიდან გამომდინარე, წინამდებარე სასესხო შეთანხმება ძალაში შესულად ჩაითვლება წინამდებარე შეთანხმების ხელმოწერიდან 90 დღის შემდეგ.

მუხლი VI

სხვადასხვა პირობა

პუნქტი 6.01. მსესხებელი ქვეყნის ფინანსთა მინისტრი მიიჩნევა მსესხებლის წარმომადგენლად სასესხო რეგულაციების 12.02 პუნქტში განსაზღვრული მიზნებიდან გამომდინარე.

პუნქტი 6.02. ქვემოთ მოყვანილი მისამართები განსაზღვრულია სასესხო რეგულაციების 12.01 პუნქტში განსაზღვრული მიზნებიდან გამომდინარე:

მსესხებლისთვის

ფინანსთა სამინისტრო
გორგასლის ქუჩა №16, 0114
თბილისი, საქართველო
ელექტრონული ფოსტა:

publicdebt@mof.ge

ADB-სთვის

აზიის განვითარების ბანკი
6 ADB-ის გამზირი
მანდალუიონგი
1550 მეტრო მანილა
ფილიპინები

ფაქსი:

(632) 8636-2444

რის დასტურადაც, მხარეები, მოქმედებენ რა სათანადოდ უფლებამოსილი წარმომადგენლების მეშვეობით, ხელს აწერენ წინამდებარე სასესხო შეთანხმებას და  უზრუნველყოფენ მის მიწოდებას ADB-ს ძირითად ოფისში, ზემოთ მითითებულ თარიღში.

განრიგი 1

პროგრამის აღწერა

1. პროგრამის მიზანია ხელი შეუწყოს საქართველოს „ხედვა 2030-ით“ გათვალისწინებული უსაფრთხო, საიმედო და მედეგი წყალმომარაგების სერვისების უზრუნველყოფას საქართველოს სამიზნე სოფლებში.

2. პროგრამა მოიცავს შემდეგ კომპონენტებს:

(a) შუალედური შედეგი 1: დასრულებულია კლიმატისა და კატასტროფების მიმართ მდგრადი წყალმომარაგების ინფრასტრუქტურა სამიზნე ტერიტორიებში, მათ შორის, მინიმუმ 100 დასახლებაში (სოფლის ტერიტორიებზე) წყალმომარაგების სისტემების დაგეგმვა და მშენებლობა (გაფართოებულია და/ან რეაბილიტირებულია); და

(b) შუალედური შედეგი 2: წყლის მომსახურების ინსტიტუციური მოწყობა და მმართველობა გაძლიერებულია.

3. პროგრამის  დასრულება 2030 წლის 31 დეკემბრისთვის იგეგმება.

განრიგი 2

ამორტიზაციის გრაფიკი

1. ქვემოთ მოცემულ ცხრილში განსაზღვრულია სესხის ძირითადი თანხის გადახდის თარიღები და სესხის მთლიანი ძირითადი თანხის პროცენტი, რომელიც გადახდილი უნდა იქნეს ძირითადი თანხის ყოველი გადახდის თარიღისათვის (სესხზე შენატანი). იმ შემთხვევაში, თუ სესხის თანხები მთლიანად უნდა ყოფილიყო ათვისებული სესხის ძირითადი თანხის დასაფარი პირველი გადახდის თარიღისათვის, სესხის ძირითადი თანხის ოდენობა, რომელიც მსესხებლის მიერ უნდა დაიფაროს სესხის ძირითადი თანხის ყოველი გადახდის თარიღისათვის განისაზღვრება ADB-ს მიერ, გამრავლდება რა: (a) სესხის ძირითადი თანხის პირველი გადახდის თარიღისათვის მთლიანად ათვისებული და დაუფარავი სესხის ძირითადი თანხა (b) სესხზე შენატანზე, ძირითადი თანხის ყოველი გადახდის თარიღისათვის; აუცილებლობის შემთხვევაში, ეს გადასახდელი თანხა შესაძლებელია ჩასწორდეს, რათა მოხდეს ამ განრიგის მე-4 პუნქტში შესული ნებისმიერი თანხების გამოქვითვა, რომლებზეც ვრცელდება ვალუტის კონვერტაცია.

2. იმ შემთხვევაში, თუ სესხის თანხები მთლიანად არ არის ათვისებული ძირითადი თანხის პირველი გადახდის თარიღისთვის, მსესხებლის მიერ  სესხის ძირითადი თანხის ყოველი გადახდის თარიღისთვის ძირითადი თანხის გადასახდელი თანხა დგინდება შემდეგნაირად:

(a) იმ შემთხევაში, თუ სესხის თანხების ნაწილი ათვისებულია ძირითადი თანხის დაფარვის პირველი გადახდის თარიღისთვის, მსესხებელმა უნდა გადაიხადოს ათვისებული და შესაბამისი თარიღისთვის გადაუხდელი თანხა ამ განრიგის 1-ელი პუნქტის შესაბამისად;

(b) ნებისმიერი თანხა, რომლის ათვისებაც მოხდა ძირითადი თანხის პირველი  გადახდის თარიღის შემდეგ, უნდა იქნეს გადახდილი ძირითადი თანხის  ყოველი გადახდის თარიღში, რომელიც დადგება აღნიშნული ათვისების შემდეგ, იმ ოდენობით, რომელსაც განსაზღვრავს ADB ყოველი ასეთი ათვისებული თანხის გამრავლებით წილადზე, რომლის მრიცხველიც იქნება სესხზე თავდაპირველი შენატანი, რომელიც განსაზღვრულია 1-ელ პუნქტში მოცემულ ცხრილში, ძირითადი თანხის შესაბამისი გადახდის თარიღისთვის (სესხზე თავდაპირველი შენატანი), ხოლო მნიშვნელი იქნება ამ თარიღში ან ამ თარიღის შემდეგ დარჩენილი ძირითადი თანხის გადახდის თარიღების შესაბამისი თავდაპირველი შენატანების ჯამი, და ამგვარად დაანგარიშებული თანხა შეიძლება ჩასწორდეს, რათა მოხდეს ამ განრიგის მე-4 პუნქტში შესული ნებისმიერი თანხების გამოქვითვა, რომლებზეც ვრცელდება ვალუტის კონვერტაცია.

3. ათვისება, რომელიც განხორციელდა ძირითადი თანხის პირველი გადახდის თარიღამდე 2 კალენდარული თვის განმავლობაში,  ძირითადი თანხის ნებისმიერი გადახდის თარიღისთვის ძირითადი თანხის დაფარვისათვის გადასახადი თანხის გამოთვლის მიზნით, იქნება ჩათვლილი როგორც ათვისებული და გადაუხდელი, გამოთხოვის თარიღიდან ძირითადი თანხის დაფარვის შემდგომი თარიღისათვის და იქნება გადასახდელი ძირითადი თანხის  ყოველი გადახდის თარიღში, დაწყებული ათვისების თარიღის შემდეგ დამდგარი ძირითადი თანხის შემდგომი გადახდის თარიღიდან.

4. მიუხედავად ამ განრიგის პირველ და მეორე პუნქტებში შესული დებულებებისა, ათვისებული სესხის ძირითადი თანხის მთლიანი ან მისი ნებისმიერი ნაწილის დამტკიცებულ ვალუტაში კონვერტირებისას, დამტკიცებულ ვალუტაში კონვერტირებული თანხა, რომელიც უნდა იქნეს გადახდილი  ძირითადი თანხის დაფარვის მიზნით რომელიმე გადახდის თარიღში, რომელიც დადგება კონვერტირების პერიოდის განმავლობაში, განისაზღვრება ADB-ის მიერ კონვერტაციამდე თავის ვალუტაში დენომინირებული აღნიშნული თანხის გამრავლებით ერთ-ერთზე მომდევნო ორიდან:  (a) გაცვლით კურსზე, რომელიც ასახავს ძირითად თანხას აღნიშნულ დამტკიცებულ ვალუტაში, რომლის გადახდაც ხდება ADB-ს მიერ ვალუტის ჰეჯირების ტრანზაქციის ფარგლებში, რომელიც დაკავშირებულია აღნიშნულ კონვერტირებასთან ან (b) იმ შემთხვევაში, თუ ADB ამგვარ გადაწყვეტილებას მიიღებს, კონვერტაციის პრინციპების შესაბამისად, გამოცხადებულ გაცვლით კურსზე.

5. თუ სესხის ათვისებული და გადაუხდელი ძირითადი თანხა დროდადრო იქნება დენომინირებული ერთზე მეტ სასესხო ვალუტაში, ამ განრიგში მოცემული დებულებები ცალ-ცალკე გამოიყენება სესხის ყოველ ვალუტაში განსაზღვრული თანხის მიმართ, ისე რომ მიღებულ იქნება ცალკე ამორტიზაციის გრაფიკი ყოველი ასეთი თანხისთვის.

განრიგი 3

სასესხო თანხების გამოთხოვა და მიღება

ზოგადი დებულება

1. თუ წინამდებარე განრიგის შესაბამისად ან ADB-თან სხვაგვარად არ იქნება შეთანხმებული, სასესხო თანხების ჩამორიცხვა განხორციელდება სესხის ჩამორიცხვის სახელმძღვანელოს შესაბამისად.

სადეპოზიტო ანგარიში

2. სესხის ანგარიშიდან თანხის გატანის პირველი განაცხადის ADB-სთვის გაგზავნამდე მსესხებელმა საქართველოს ეროვნულ ბანკში უნდა გამოყოს პროგრამისთვის ანგარიში, სადაც მოხდება სესხის ანგარიშიდან გამოტანილი მთელი თანხის დეპონირება.

3. მსესხებელმა უნდა შეინარჩუნოს სადეპოზიტო ანგარიშის განცალკევებული ანგარიშები და ჩანაწერები ADB-სთვის მისაღები ბუღალტრული აღრიცხვის პრინციპების შესაბამისად.

სასესხო ანგარიშიდან თანხის გამოთხოვის საფუძველი

4. (a) ცხრილი ასახავს სესხის იმ თანხებს, რომლებიც განკუთვნილია ასათვისებლად ათვისებაზე მიბმული ინდიკატორების (DLI) შესაბამისად, იმ შემთხვევაში, თუ მსესხებელი შეასრულებს შესაბამისი DLI-ის მიზნებს, როგორც ეს მოცემულია DLI-ის მატრიცაში. ცხრილში მითითებული მაჩვენებლები და წლები საორიენტაციოა. ისინი არ ზღუდავენ თანხის ათვისებას იმ საფუძვლით, რომ DLI-ის მიზნები მიღწეულია ცხრილში მითითებულ წელზე ადრე ან გვიან, იმ პირობით, რომ ასეთი DLI-ის მიზნების მიღწევა მოხდება პროგრამის დასრულების თარიღისთვის ან უფრო ადრე.

(b) ADB უფლებამოსილია მსესხებელთან შეთანხმებით გადაანაწილოს ცხრილში მითითებული სესხის თანხები იმავე DLI-ის ფარგლებში ან ერთი ინდიკატორიდან მეორეში.

5. მსესხებლის მიერ DLI-ის შესაბამისად სასესხო ანგარიშიდან თანხის ათვისების მოთხოვნამდე, მან პროგრამის განმახორციელებელი უწყების მეშვეობით, DLI-ის ვერიფიკაციის პროტოკოლის შესაბამისად ADB-ს უნდა წარუდგინოს დამაკმაყოფილებელი მტკიცებულება იმის თაობაზე, რომ: (a) აღნიშნული DLI სრულად მიღწეულია; ან (b) იმ შემთხვევაში, თუ DLI-ის შემთხვევაში დასაშვებია თანხის ნაწილობრივი ათვისება (როგორც ეს მითითებულია DLI მატრიცაში), აღნიშნული ინდიკატორის მიღწეული დონე, DLI-ის ვერიფიკაციის პროტოკოლის შესაბამისად, საკმარისია ნაწილობრივი ათვისებისთვის. მას შემდეგ, რაც ADB დაადასტურებს ინდიკატორის სრულად ან ნაწილობრივ შესრულებას, მსესხებელს ექნება უფლება ADB-ს წარუდგინოს აღნიშნული DLI-სთვის სესხის შესაბამისი თანხის ათვისების განაცხადი.

წინასწარი დაფინანსება

6. DLI-ების მიღწევამდე, მსესხებელს შეუძლია სესხის ანგარიშიდან წინასწარი დაფინანსებისთვის თანხის გატანა, პროგრამის დაფინანსების საჭიროებების დასაკმაყოფილებლად და აღნიშნული DLI-ების მისაღწევად, იმ პირობით, რომ წინასწარი დაფინანსების მიმდინარე ოდენობა არ უნდა აღემატებოდეს სესხის თანხის 25%-ს. წინასწარი დაფინანსების თანხას, ან მის ნაწილს, ADB გამოქვითავს DLI-ების მიღწევის საფუძველზე გასაცემი სასესხო თანხებიდან.

შერიგება

7. თუ პროგრამის დასრულების თარიღისთვის ვერ მოხერხდება რომელიმე DLI-ის მიღწევა, მსესხებელმა პროგრამის დასრულების თარიღიდან 6 თვის ვადაში უნდა აუნაზღაუროს ADB-ს წინასწარი დაფინანსების ის გადასახდელი თანხა ან მისი ნაწილი, რომელიც გაწეულ იქნა შესაბამისი DLI-ისთვის. 

8. თუ პროგრამით გათვალისწინებული სრული დასაშვები ხარჯები მსესხებლის მიერ ათვისებული სესხის თანხაზე ნაკლებია, მსესხებელმა ADB-ს უნდა დაუბრუნოს სხვაობის თანხა პროგრამის დასრულების თარიღიდან 6 თვის ვადაში.

განრიგი 3-ის დანართი 2