საქართველოს შინაგან საქმეთა სამინისტროს საჯარო სამართლის იურიდიულ პირ – საზოგადოებრივი უსაფრთხოების მართვის ცენტრ „112“-ში შესული შეტყობინებების პირველადი რეაგირების მიზნით საქართველოს შინაგან საქმეთა სამინისტროს უფლებამოსილი სუბიექტებისათვის მიწოდებისა და მათთან კოორდინირებული მუშაობის წესის დამტკიცების თაობაზე

დოკუმენტის სტრუქტურა

განმარტებების დათვალიერება

დაკავშირებული დოკუმენტები

დოკუმენტის კომენტარები

დოკუმენტის მონიშვნები

კონსოლიდირებული პუბლიკაციები

07/11/2025 10/11/2023 07/04/2020

უკან დაბრუნება

საქართველოს შინაგან საქმეთა სამინისტროს საჯარო სამართლის იურიდიულ პირ – საზოგადოებრივი უსაფრთხოების მართვის ცენტრ „112“-ში შესული შეტყობინებების პირველადი რეაგირების მიზნით საქართველოს შინაგან საქმეთა სამინისტროს უფლებამოსილი სუბიექტებისათვის მიწოდებისა და მათთან კოორდინირებული მუშაობის წესის დამტკიცების თაობაზე
დოკუმენტის ნომერი	30
დოკუმენტის მიმღები	საქართველოს შინაგან საქმეთა მინისტრი
მიღების თარიღი	06/04/2020
დოკუმენტის ტიპი	საქართველოს მინისტრის ბრძანება
გამოქვეყნების წყარო, თარიღი	ვებგვერდი, 07/04/2020
სარეგისტრაციო კოდი	140130000.22.034.016962
კონსოლიდირებული პუბლიკაციები

PDF გადმოწერა

თქვენ უყურებთ დოკუმენტის პირველად სახეს
დოკუმენტის კონსოლიდირებული ვარიანტის ნახვა ფასიანია, აუცილებელია სისტემაში შესვლა და საჭიროების შემთხვევაში დათვალიერების უფლების ყიდვა, გთხოვთ გაიაროთ რეგისტრაცია ან თუ უკვე რეგისტრირებული ხართ, გთხოვთ, შეხვიდეთ სისტემაში

პირველადი სახე (07/04/2020 - 10/11/2023)

საქართველოს შინაგან საქმეთა სამინისტროს საჯარო სამართლის იურიდიულ პირ – საზოგადოებრივი უსაფრთხოების მართვის ცენტრ „112“-ში შესული შეტყობინებების პირველადი რეაგირების მიზნით საქართველოს შინაგან საქმეთა სამინისტროს უფლებამოსილი სუბიექტებისათვის მიწოდებისა და მათთან კოორდინირებული მუშაობის წესის დამტკიცების თაობაზე

„სამოქალაქო უსაფრთხოების შესახებ“ საქართველოს კანონის მე-19 მუხლის მე-2 პუნქტის, „პოლიციის შესახებ“ საქართველოს კანონის მე-5 მუხლის მე-3 პუნქტის, „ნორმატიული აქტების შესახებ“ საქართველოს ორგანული კანონის 25-ე მუხლისა და „საქართველოს შინაგან საქმეთა სამინისტროს დებულების დამტკიცების შესახებ“ საქართველოს მთავრობის 2013 წლის 13 დეკემბრის №337 დადგენილების მე-5 მუხლის მე-2 პუნქტის „ა“ და „ნ“ ქვეპუნქტების საფუძველზე, ვბრძანებ:

მუხლი 1

დამტკიცდეს საქართველოს შინაგან საქმეთა სამინისტროს საჯარო სამართლის იურიდიულ პირ – საზოგადოებრივი უსაფრთხოების მართვის ცენტრ „112“-ში შესული შეტყობინებების პირველადი რეაგირების მიზნით საქართველოს შინაგან საქმეთა სამინისტროს უფლებამოსილი სუბიექტებისათვის მიწოდებისა და მათთან კოორდინირებული მუშაობის წესი.

მუხლი 2

ძალადაკარგულად გამოცხადდეს „საქართველოს შინაგან საქმეთა სამინისტროს საჯარო სამართლის იურიდიული პირის – „112“-ზე შესული შეტყობინებების პირველადი რეაგირებისათვის საქართველოს შინაგან საქმეთა სამინისტროს უფლებამოსილი სუბიექტებისათვის მიწოდებისა და მათთან კოორდინირებული მუშაობის წესის დამტკიცების თაობაზე“ საქართველოს შინაგან საქმეთა მინისტრის 2019 წლის 6 დეკემბრის №96 ბრძანება (www.matsne.gov.ge, 09/12/2019, სარეგისტრაციო კოდი: 140130000.22.034.016921).

მუხლი 3

ეს ბრძანება ამოქმედდეს გამოქვეყნებისთანავე.

საქართველოს შინაგან საქმეთა მინისტრი ვახტანგ გომელაური

საქართველოს შინაგან საქმეთა სამინისტროს საჯარო სამართლის იურიდიულ პირ – საზოგადოებრივი უსაფრთხოების მართვის ცენტრ „112“-ში შესული შეტყობინებების პირველადი რეაგირების მიზნით საქართველოს შინაგან საქმეთა სამინისტროს უფლებამოსილი სუბიექტებისათვის მიწოდებისა და მათთან კოორდინირებული მუშაობის წესი

მუხლი 1

1. ეს წესი განსაზღვრავს საქართველოს შინაგან საქმეთა სამინისტროს (შემდგომ – სამინისტრო) საჯარო სამართლის იურიდიულ პირ – საზოგადოებრივი უსაფრთხოების მართვის ცენტრ „112“-სა (შემდგომ – საზოგადოებრივი უსაფრთხოების მართვის ცენტრი „112“) და სამინისტროს ადმინისტრაციას (დეპარტამენტი), სამინისტროს საპატრულო პოლიციის დეპარტამენტს (შემდგომ – საპატრულო პოლიციის დეპარტამენტი), სამინისტროს ტერიტორიულ ორგანოებსა და სამინისტროს მმართველობის სფეროში შემავალ სახელმწიფო საქვეუწყებო დაწესებულება – საგანგებო სიტუაციების მართვის სამსახურს (შემდგომ – საგანგებო სიტუაციების მართვის სამსახური) შორის (შემდგომ – უფლებამოსილი სუბიექტი) მიღებულ შეტყობინებებზე კოორდინირებული მუშაობის წესსა და საგანგებო სიტუაციებისა და სხვა ინციდენტებთან დაკავშირებით მიღებულ შეტყობინებებზე პირველადი რეაგირების საკითხებს.

2. სამინისტროს უფლებამოსილი სუბიექტისთვის საზოგადოებრივი უსაფრთხოების მართვის ცენტრი „112“-ის მიერ მიღებული შეტყობინების გადაცემა ხორციელდება ERC-„112“-ის პროგრამაში არსებული კატეგორიების („შსს“, „C”, „P", „S“ და „F-R“) მიხედვით შემდეგი პრინციპით:

ა) სამინისტროს საპატრულო პოლიციის დეპარტამენტს გადაეცემა ის შეტყობინებები, სადაც რეაგირებაზე უფლებამოსილ ერთ-ერთ სუბიექტად მითითებულია „P“ კატეგორია;

ბ) სამინისტროს ტერიტორიულ ორგანოს გადაეცემა ის შეტყობინებები, სადაც რეაგირებაზე უფლებამოსილ ერთ-ერთ სუბიექტად მითითებულია „C“ კატეგორია, ასევე სამინისტროს საპატრულო პოლიციის დეპარტამენტის სამოქმედო ტერიტორიის ფარგლებს გარეთ არსებულ შემთხვევებთან დაკავშირებით მიღებული ის შეტყობინებები, სადაც რეაგირებაზე უფლებამოსილ ერთ-ერთ სუბიექტად მითითებულია „P“ კატეგორია;

გ) ის შეტყობინებები, სადაც რეაგირებაზე უფლებამოსილ ერთ-ერთ სუბიექტად მითითებულია „შსს“, საქმე შემდგომი რეაგირებისათვის გადაეცემა სამინისტროს ადმინისტრაციის სამობილიზაციო და ოპერატიულ-სამორიგეო სამმართველოს ოპერატიულ – სამორიგეო სამსახურის სამორიგეო განყოფილებას ელექტრონული დოკუმენტბრუნვის სისტემა – „Eflow”-ს მეშვეობით;

დ) ის შეტყობინებები, სადაც ერთ-ერთ სუბიექტად მითითებულია „S“, საქმე ინფორმაციის სახით გადაეცემა სამინისტროს ადმინისტრაციის სამობილიზაციო და ოპერატიულ-სამორიგეო სამმართველოს ოპერატიულ-სამორიგეო სამსახურის სამორიგეო განყოფილებას ERC-„112“-ის პროგრამის მეშვეობით;

ე) ის შეტყობინებები, სადაც რეაგირებაზე უფლებამოსილ ერთ-ერთ სუბიექტად მითითებულია „F-R“, საქმე შემდგომი რეაგირებისათვის გადაეცემა საგანგებო სიტუაციების მართვის სამსახურს.

3. საზოგადოებრივი უსაფრთხოების მართვის ცენტრი „112“-ში შემოსული ინციდენტების ნუსხაში (დანართი №1) ტერმინი „საკონსულტაციო“ აღნიშნავს იმგვარ შეტყობინებას, როდესაც უფლებამოსილი სუბიექტისთვის შეტყობინების გადაცემა არ ხორციელდება. ამასთან, ნუსხაში მითითებული ინციდენტების დახასიათება არის პირობითი ხასიათის.

4. სამინისტროს უფლებამოსილი სუბიექტი ვალდებულია დაუყოვნებლივ აცნობოს საზოგადოებრივი უსაფრთხოების მართვის ცენტრი „112“-ს განხორციელებული სტრუქტურული, საკომუნიკაციო ან ნებისმიერი ისეთი ცვლილების შესახებ, რაც შეაფერხებს საზოგადოებრივი უსაფრთხოების მართვის ცენტრი „112“-ის მიერ შეტყობინების მიწოდებას.

მუხლი 2

1. ქ. თბილისის მასშტაბით საზოგადოებრივი უსაფრთხოების მართვის ცენტრი „112“-ის მიერ საპატრულო პოლიციის დეპარტამენტისათვის განკუთვნილი შეტყობინება გადაეცემა შესაბამისი რაიონის ოცეულის მეთაურს, როგორც რადიოკავშირის (რადიოეთერის დაკავების შემთხვევაში – ტელეფონით), ასევე ბორტ კომპიუტერებზე არსებული საზოგადოებრივი უსაფრთხოების მართვის ცენტრი „112“-ის პროგრამის საშუალებით. ოცეულის მეთაურთან დაკავშირების შეუძლებლობის შემთხვევაში – დაკავშირება ხდება შესაბამისი რაიონის თავისუფალ ეკიპაჟთან.

2. საპატრულო პოლიციის დეპარტამენტის ქ. თბილისის მთავარი სამმართველოს ოცეულის მეთაური იღებს გადაწყვეტილებას კონკრეტულ გამოძახებაზე გასაგზავნი შესაბამისი საპატრულო პოლიციის დეპარტამენტის ეკიპაჟის/ეკიპაჟების (შემდგომ – საპატრულო ეკიპაჟი) განსაზღვრის შესახებ.

3. საპატრულო პოლიციის დეპარტამენტის ქ. თბილისის მთავარი სამმართველოს ოცეულის მეთაური პირადად ან საზოგადოებრივი უსაფრთხოების მართვის ცენტრი „112“-ის დისპეტჩერის მეშვეობით საპატრულო ეკიპაჟს გადასცემს შემოსულ შეტყობინებას პირველადი რეაგირების მიზნით რადიოკავშირის და ბორტ კომპიუტერებზე არსებული საზოგადოებრივი უსაფრთხოების მართვის ცენტრი „112“-ის პროგრამის საშუალებით. პირადად გადაცემის შემთხვევაში, აღნიშნული ქმედების შესახებ ატყობინებს საზოგადოებრივი უსაფრთხოების მართვის ცენტრი „112“-ის დისპეტჩერს, რომელიც უზრუნველყოფს ეკიპაჟთან შემდგომ კოორდინირებულ მუშაობას.

4. საპატრულო პოლიციის დეპარტამენტის ქ. თბილისის მთავარი სამმართველოს ოცეულის მეთაური საპატრულო ეკიპაჟის შეცვლის შემთხვევაში ვალდებულია აღნიშნული დაუყოვნებლივ აცნობოს საზოგადოებრივი უსაფრთხოების მართვის ცენტრი „112“-ის დისპეტჩერს ცვლილების პროგრამულად ასახვის უზრუნველყოფის მიზნით.

5. საპატრულო პოლიციის დეპარტამენტის ქ. თბილისის მთავარი სამმართველოს ოცეულის მეთაური ვალდებულია ცვლის განმავლობაში მუდმივად ჰქონდეს წვდომა ERC – „112“-ის პროგრამასთან ბორტ კომპიუტერის საშუალებით, ხოლო პროგრამის გამოყენების რაიმე მიზეზით შეფერხების შემთხვევაში აცნობოს საზოგადოებრივი უსაფრთხოების მართვის ცენტრი „112“-ის დისპეტჩერს.

6. საზოგადოებრივი უსაფრთხოების მართვის ცენტრი „112“-ის დისპეტჩერი ვალდებულია:

ა) საჭიროების შემთხვევაში უშუალოდ დაუკავშირდეს საპატრულო პოლიციის დეპარტამენტის ქ. თბილისის მთავარი სამმართველოს ოცეულის მეთაურის მიერ გამოყოფილ საპატრულო ეკიპაჟს/ეკიპაჟებს და მიაწოდოს ინფორმაცია გამოძახების მისამართის, შემთხვევის და შეტყობინებასთან დაკავშირებული დამატებითი ინფორმაციის შესახებ;

ბ) საპატრულო პოლიციის დეპარტამენტის ქ. თბილისის მთავარი სამმართველოს საპატრულო ეკიპაჟთან უშუალოდ დაკავშირების შემთხვევაში საქმის გადაცემა ასახოს პროგრამულად;

გ) პროგრამის გამოყენების რაიმე მიზეზით შეფერხების შემთხვევაში, საპატრულო პოლიციის დეპარტამენტის ქ. თბილისის მთავარი სამმართველოს საპატრულო ეკიპაჟის მიერ გადმოცემული ინფორმაცია შემთხვევის ადგილზე მისვლის, საქმის დასრულების და დამდგარი შედეგის შესახებ დააფიქსიროს პროგრამულად.

მუხლი 3

საპატრულო პოლიციის დეპარტამენტის ქ. თბილისის მთავარი სამმართველოს საპატრულო ეკიპაჟი ვალდებულია:

ა) რადიოკავშირით ან ტელეფონით მიმართვისას დაუყოვნებლივ გამოეხმაუროს საზოგადოებრივი უსაფრთხოების მართვის ცენტრი „112“-ის დისპეტჩერს;

ბ) ინფორმაცია შეტყობინების მიღების შემდეგ დააფიქსიროს პროგრამულად და რადიოკავშირის/ტელეფონის მეშვეობით დაუდასტუროს საზოგადოებრივი უსაფრთხოების მართვის ცენტრი „112“-ის დისპეტჩერს;

გ) მიღებულ საქმეზე რეაგირების შეფერხების შემთხვევაში (თუ საპატრულო ეკიპაჟი შეესწრო სხვა შემთხვევას ან საპატრულო ეკიპაჟის გადაადგილება ფერხდება ავტომანქანის ტექნიკური პრობლემის გამო და ა.შ.) მიზეზი დაუყოვნებლივ აცნობოს საზოგადოებრივი უსაფრთხოების მართვის ცენტრი „112“-ის დისპეტჩერს;

დ) შემთხვევის ადგილზე გასვლა, მისვლა, დამდგარი შედეგის შესახებ ინფორმაცია და საქმის დასრულება დააფიქსიროს პროგრამულად და აღნიშნულის შესახებ ინფორმაცია გადასცეს საზოგადოებრივი უსაფრთხოების მართვის ცენტრი „112“-ის დისპეტჩერს რადიოკავშირის/ტელეფონის მეშვეობით;

ე) აცნობოს უშუალოდ საზოგადოებრივი უსაფრთხოების მართვის ცენტრი „112“-ის დისპეტჩერს დამატებითი საპატრულო ეკიპაჟის ან სხვა სამსახურის საჭიროების შესახებ.

მუხლი 4

1. საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველოსა და საპატრულო პოლიციის დეპარტამენტის სამორიგეო-საინფორმაციო სამმართველოს შორის სამუშაო პროცესის კოორდინაცია ხორციელდება ერთიანი ინფორმაციული სისტემის – ERC - „112“-ის მეშვეობით.

2. სამუშაო პროცესის მუდმივ რეჟიმში პროგრამული ხედვის უზრუნველყოფიდან გამომდინარე, საპატრულო პოლიციის დეპარტამენტის სამორიგეო-საინფორმაციო სამმართველო ვალდებულია:

ა) დაუყონებლივ გადასცეს საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველოს საპატრულო პოლიციის დეპარტამენტის ქ. თბილისის მთავარი სამმართველოს სახაზო-საპატრულო სამმართველოებიდან, მეტროპოლიტენის სამმართველოებისა და ტურისტული უსაფრთხოების ქვეით პატრულთა სამმართველოდან მიღებული განწესი;

ბ) ქ. თბილისის პოლიციის დეპარტამენტის ადმინისტრაციის (სამმართველო) ოპერატიულ-სამორიგეო განყოფილებისათვის გადაცემული შეტყობინება ნომრით და შინაარსით დააფიქსიროს ERC-„112“-ის პროგრამაში შესაბამისი საქმის ჩატში (ღია ტექსტურ ველში);

გ) შეტყობინებათა პროგრამული ხედვის ნებისმიერი მიზეზით შეფერხების ან შეწყვეტის შემთხვევაში დაუყოვნებლივ აცნობოს საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველოს.

მუხლი 5

1. საქართველოს ტერიტორიაზე, გარდა ქ. თბილისისა საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველოს და საპატრულო პოლიციის დეპარტამენტის რეგიონალურ დანაყოფებს შორის ინფორმაციის ორმხრივი მიმოცვლა ხდება ერთიანი ინფორმაციული სისტემის – ERC-„112“-ის პროგრამის მეშვეობით.

2. საპატრულო პოლიციის დეპარტამენტის რეგიონალური დანაყოფის სამორიგეო ვალდებულია:

ა) მისი ტერიტორიის საზღვრებში შემავალი საქმის ERC-„112“-ში დარეგისტრირებისთანავე მოახდინოს რეაგირება და პროგრამულად ასახოს სტატუსები: „მიმდინარე“, „გაგზავნილია ბრიგადა“, „დასრულებულია“, ასევე დააფიქსიროს საქმეზე გასული ეკიპაჟის საძახისი, მისვლა და დამდგარი შედეგის შესახებ ინფორმაცია;

ბ) იმ შემთხვევაში, თუ სტატუსის „მიმდინარე“ მინიჭების შემდეგ გაარკვევს, რომ შემთხვევა არ არის მის სამოქმედო ტერიტორიაზე, დამოუკიდებლად გადასცეს შეტყობინება შესაბამის დანაყოფს და ERC-„112“-ის პროგრამის საქმის სარეგისტრაციო ფორმაში (შემდგომ – საქმის სარეგისტრაციო ფორმა) დააფიქსიროს აღნიშნული ინფორმაცია;

გ) შეტყობინებათა დუბლირების აღმოჩენის შემთხვევაში, საქმის სარეგისტრაციო ფორმაში გააკეთოს შესაბამისი ჩანაწერი;

დ) დაადასტუროს საზოგადოებრივი უსაფრთხოების მართვის ცენტრი „112“-ის მიერ ERC-„112“-ის საქმის კომუნიკატორით (ჩათი) გადაცემული დამატებითი ინფორმაციის მიღება;

ე) ERC-„112“-ის საქმის კომუნიკატორით (ჩათი) ინფორმაციის გადაცემის შემთხვევაში, საზოგადოებრივი უსაფრთხოების მართვის ცენტრი „112“-ის დადასტურების მიუღებლობის შემთხვევაში დაკავშირება განახორციელოს ტელეფონის საშუალებით;

ვ) შეტყობინებათა პროგრამული ხედვის ნებისმიერი მიზეზით შეფერხების ან შეწყვეტის შემთხვევაში დაუყოვნებლივ აცნობოს საზოგადოებრივი უსაფრთხოების მართვის ცენტრი „112“-ს.

3. საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველო ვალდებულია:

ა) ამ მუხლის მე-2 პუნქტის „ვ“ ქვეპუნქტით გათვალისწინებულ შემთხვევაში მიღებულ შეტყობინებათა გადაცემა უზრუნველყოს სატელეფონო საშუალებით;

ბ) დაადასტუროს საპატრულო პოლიციის დეპარტამენტის რეგიონალური დანაყოფის მიერ ERC-„112“-ის საქმის კომუნიკატორით (ჩათი) გადაცემული დამატებითი ინფორმაციის მიღება;

გ) ERC-„112“-ის საქმის კომუნიკატორით (ჩათი) ინფორმაციის გადაცემის შემთხვევაში, საპატრულო პოლიციის დეპარტამენტის რეგიონალური დანაყოფის სამორიგეოს დადასტურების მიუღებლობის შემთხვევაში დაკავშირება განახორციელოს ტელეფონის საშუალებით.

მუხლი 6

1. საპატრულო პოლიციის დეპარტამენტის სამორიგეო-საინფორმაციო სამმართველო შეტყობინების მიღების შემდეგ დამოუკიდებლად ახორციელებს რეაგირებას და განხორციელებული რეაგირების შესახებ აფიქსირებს საქმეში შემდეგ ინციდენტებს:

ა) უფლების გარეშე სატრანსპორტო საშუალების მართვის შესახებ;

ბ) არაფხიზელ მდგომარეობაში სატრანსპორტო საშუალების მართვის შესახებ;

გ) დაკარგული სანომრე ნიშნის შესახებ;

დ) ნაპოვნი სანომრე ნიშნის შესახებ;

ე) მიტოვებული ავტომანქანის შესახებ;

ვ) ალკოტესტიანი ეკიპაჟის მოთხოვნის შესახებ;

ზ) პარკირების პრობლემის შესახებ, გარდა საგზაო ნიშნის მოქმედების ზონისა და სავალი ნაწილის ჩაკეტვისა;

თ) იმ საგზაო-სატრანსპორტო შემთხვევის შესახებ, რამაც გამოიწვია ჯანმრთელობის დაზიანება (მხოლოდ სამედიცინო დაწესებულებიდან შემოსული შეტყობინებები);

ი) ახდილი ჭის ლუქის შესახებ;

კ) საგზაო/სარემონტო სამუშაოების შესახებ;

ლ) პრეტენზია საპატრულო პოლიციასთან.

2 ამ მუხლის პირველი პუნქტის „ლ“ ქვეპუნქტით გათვალისწინებულ ინციდენტზე საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველო საპატრულო პოლიციის დეპარტამენტის სამორიგეო-საინფორმაციო სამმართველოს შეტყობინებას უგზავნის ელექტრონული დოკუმენტბრუნვის სისტემა – „Eflow“-ს მეშვეობით.

მუხლი 7

1. საზოგადოებრივი უსაფრთხოების მართვის ცენტრი „112“-ის მიერ სამინისტროს ტერიტორიული ორგანოებისთვის შეტყობინებათა გადაცემა და მხარეთა შორის საქმიანობის კოორდინაცია ხორციელდება ერთიანი ინფორმაციული სისტემის – ERC – „112“-ის ან/და სამინისტროს ელექტრონული დოკუმენტბრუნვის სისტემა – „Eflow“-ს მეშვეობით. ERC-„112“-ის მეშვეობით ინფორმაცია მიეწოდება სამინისტროს ტერიტორიულ ორგანოებს, ხოლო „eflow“-ს საშუალებით – სამინისტროს ტერიტორიული ორგანოების დანაყოფებს სამოქმედო ტერიტორიების მიხედვით. გამონაკლის შემთხვევებში შეტყობინებათა გადაცემა ხორციელდება სატელეფონო კავშირის საშუალებით.

2. სამინისტროს ტერიტორიული ორგანო ვალდებულია:

ა) მისი ტერიტორიის საზღვრებში შემავალი საქმის ERC-„112“-ში დარეგისტრირებისთანავე დაუყოვნებლივ მოახდინოს რეაგირება, აღნიშნული ინფორმაცია პროგრამულად ასახოს სტატუსით – „მიმდინარე“ და შეტყობინება შემდგომი რეაგირებისთვის გადასცეს შესაბამის დანაყოფს რადიოკავშირის ან ტელეფონის საშუალებით;

ბ) მისი ტერიტორიის ფარგლებში პოლიციის გასვლა დააფიქსიროს სტატუსით – „გაგზავნილია ბრიგადა“;

გ) იმ შემთხვევაში, თუ გაარკვევს, რომ შემთხვევა არ არის მის სამოქმედო ტერიტორიაზე, დამოუკიდებლად გადასცეს შეტყობინება შესაბამის დანაყოფს და ERC-„112“-ის საქმის ჩატში (ღია ტექსტურ ველში) დააფიქსიროს ეს ინფორმაცია;

დ) შეტყობინებათა დუბლირების აღმოჩენის შემთხვევაში საქმის სარეგისტრაციო ფორმაში გააკეთოს შესაბამისი ჩანაწერი;

ე) დაადასტუროს საზოგადოებრივი უსაფრთხოების მართვის ცენტრი „112“-ის მიერ ERC-„112“-ის საქმის კომუნიკატორით (ჩათი) გადაცემული დამატებითი ინფორმაციის მიღება და გადასცეს შესაბამის დანაყოფს;

ვ) ERC-„112“-ის საქმის კომუნიკატორით (ჩათი) ინფორმაციის გადაცემის შემთხვევაში, საზოგადოებრივი უსაფრთხოების მართვის ცენტრი „112“-ისგან დადასტურების მიუღებლობის შემთხვევაში დაკავშირება განახორციელოს ტელეფონის საშუალებით;

ზ) შეტყობინებათა პროგრამული ხედვის ნებისმიერი მიზეზით შეფერხების ან შეწყვეტის შემთხვევაში დაუყოვნებლივ აცნობოს საზოგადოებრივი უსაფრთხოების მართვის ცენტრი „112“-ს.

ა) ამ მუხლის მე-2 პუნქტის „ზ“ ქვეპუნქტით გათვალისწინებულ შემთხვევაში მიღებულ შეტყობინებათა გადაცემა უზრუნველყოს სატელეფონო კავშირის მეშვეობით;

ბ) დაადასტუროს სამინისტროს ტერიტორიული ორგანოს მიერ ERC-„112“-ის საქმის კომუნიკატორით (ჩათი) გადაცემული დამატებითი ინფორმაციის მიღება;

გ) ERC-„112“-ის საქმის კომუნიკატორით (ჩათი) ინფორმაციის გადაცემის შემთხვევაში, ტერიტორიული ორგანოდან დადასტურების მიუღებლობის შემთხვევაში დაკავშირება განახორციელოს ტელეფონის საშუალებით.

მუხლი 8

სამინისტროს ადმინისტრაციის სამობილიზაციო და ოპერატიულ-სამორიგეო სამმართველოს ოპერატიულ-სამორიგეო სამსახურის სამორიგეო განყოფილებასა და საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველოს შორის შეტყობინებათა გადაცემა ხორციელდება სამინისტროს ელექტრონული დოკუმენტბრუნვის სისტემა – „Eflow”-სა და ERC-„112“-ის პროგრამის მეშვეობით, ხოლო გამონაკლის შემთხვევებში – სატელეფონო კავშირის საშუალებით.

მუხლი 9

1. საგანგებო სიტუაციების მართვის სამსახურსა და საზოგადოებრივი უსაფრთხოების მართვის ცენტრი „112“-ის ოპერატიული მართვის სამმართველოს შორის ინფორმაციის ორმხრივი მიმოცვლა ხდება ერთიანი ინფორმაციული სისტემის – ERC-„112“-ის მეშვეობით.

2. საგანგებო სიტუაციების მართვის სამსახურის სახანძრო-სამაშველო ძალების დეპარტამენტის ადმინისტრირების მთავარი სამმართველოს ოპერატიული მართვის სამმართველო ვალდებულია:

ა) საქმის ERC-„112“-ში დარეგისტრირებისთანავე მოახდინოს რეაგირება და პროგრამულად ასახოს სტატუსები: „მიმდინარე", „გაგზავნილია ბრიგადა", „დასრულებულია", ასევე დააფიქსიროს დამდგარი შედეგის შესახებ ინფორმაცია;

ბ) შეტყობინებათა დუბლირების აღმოჩენის შემთხვევაში საქმის სარეგისტრაციო ფორმაში გააკეთოს შესაბამისი ჩანაწერი;

გ) დაადასტუროს საზოგადოებრივი უსაფრთხოების მართვის ცენტრი „112“-ის მიერ ERC-„112“-ის საქმის კომუნიკატორით (ჩათი) გადაცემული დამატებითი ინფორმაციის მიღება;

დ) ERC-„112“-ის საქმის კომუნიკატორით (ჩათი) ინფორმაციის გადაცემის შემთხვევაში, საზოგადოებრივი უსაფრთხოების მართვის ცენტრი „112“-ისგან დადასტურების მიუღებლობის შემთხვევაში დაკავშირება განახორციელოს ტელეფონის საშუალებით;

ე) შეტყობინებათა პროგრამული ხედვის ნებისმიერი მიზეზით შეფერხების ან შეწყვეტის შემთხვევაში დაუყოვნებლივ აცნობოს საზოგადოებრივი უსაფრთხოების მართვის ცენტრ „112“-ს.

ა) ამ მუხლის მე-2 პუნქტის „ე“ ქვეპუნქტით გათვალისწინებულ შემთხვევაში მიღებულ შეტყობინებათა გადაცემა უზრუნველყოს სატელეფონო საშუალებით;

ბ) დაადასტუროს საგანგებო სიტუაციების მართვის სამსახურის სახანძრო-სამაშველო ძალების დეპარტამენტის ადმინისტრირების მთავარი სამმართველოს ოპერატიული მართვის სამმართველოს მიერ ERC-„112“-ის საქმის კომუნიკატორით (ჩათი) გადაცემული დამატებითი ინფორმაციის მიღება;

გ) ERC-„112“-ის საქმის კომუნიკატორით (ჩათი) ინფორმაციის გადაცემის შემთხვევაში, საგანგებო სიტუაციების მართვის სამსახურის სახანძრო-სამაშველო ძალების დეპარტამენტის ადმინისტრირების მთავარი სამმართველოს ოპერატიული მართვის სამმართველოს დადასტურების მიუღებლობის შემთხვევაში დაკავშირება განახორციელოს ტელეფონის საშუალებით;

დ) საქმესთან დაკავშირებული დამატებითი ინფორმაცია დააფიქსიროს შენიშვნის ველში ან/და ERC-„112“-ის საქმის კომუნიკატორში (ჩათი).

დანართი №1

საზოგადოებრივი უსაფრთხოების მართვის ცენტრი „112“-ში შემოსული ინციდენტების ნუსხა

№	სახელი	პრიორიტეტი	კატეგო რიები	კატეგო რიები	კატეგო რიები	კატეგო რიები	კატეგორიები	აღწერა	შენიშვნა
1	უკანონო აბორტი	მაღალი	P	C				არასპეციალისტის მიერ ან არასათანადო დაწესებულებაში ჩატარებული აბორტის პროცედურა.
2	ადამიანით ვაჭრობა (ტრეფიკინგი)	მაღალი	P	C				ადამიანებით ვაჭრობა/ტრეფიკინგი; არასრულწლოვნით ვაჭრობა (ტრეფიკინგი); ადამიანით ვაჭრობის (ტრეფიკინგის) მსხვერპლის (დაზარალებულის) მომსახურებით სარგებლობა.
3	საგზაო-მოძრაობის წესების დარღვევა	საშუალო	P					მოქალაქის მიერ ნებისმიერი საგზაო მოძრაობის წესის დარღვევა (მაგ.: ავარიული სიტუაციის შექმნა, გადაჭარბებული სიჩქარით მოძრაობა ა.შ.).
4	საგზაო-სატრანსპორტო შემთხვევა (ადმინისტრაციული სამართალდარღვევა)	საშუალო	P					საგზაო-სატრანსპორტო შემთხვევა, რომლის შედეგადაც მოქალაქეს არ აღენიშნება სხეულის დაზიანება.
5	საგზაო-სატრანსპორტო შემთხვევა ჯანმრთელობის დაზიანებით	მაღალი	P				F-R	საგზაო-სატრანსპორტო შემთხვევა, რომელმაც გამოიწვია ადმიანის ჯანმრთელობის გაუარესება ან გარდაცვალება
6	ალკოტესტიანი ეკიპაჟი	დაბალი	P					შეტყობინება, როდესაც პოლიციის თანამშრომელი ითხოვს ალკოტესტიან ეკიპაჟს
7	ამბულანსე	მაღალი	P					შეტყობინება, როდესაც სასწრაფო დახმარების ბრიგადა ითხოვს პოლიციის დახმარებას რადიოსადგურის ან ტელეფონის საშუალებით, კოდური სიტყვით „AMBULANCE“ და ადგილზე არსებული გარემოებების გამო ვერ აკონკრეტებს პოლიციის გამოძახების/მოთხოვნის მიზეზს.
8	არ დახვდა სატრანსპორტო საშუალება	საშუალო	P					შეტყობინება, როდესაც მოქალაქეს ადგილზე არ დახვდა სატრანსპორტო საშუალება, მაგრამ ვერ აკონკრეტებს მოიპარეს, საჯარიმოზე წაიყვანეს თუ სხვა რაიმე მიზეზით გადაადგილეს.
9	არ იხდის თანხას	დაბალი	P	c				შეტყობინება, გაწეული მომსახურების საფასურის გადაუხდელობასთან დაკავშირებით, როდესაც რესტორანში, საავადმყოფოში და ა.შ. არ იხდის თანხას.	P რეაგირებას ახდენს მხოლოდ იმ შემთხვევაში, თუ პიროვნება, რომელიც არ იხდის თანხას უშუალოდ იმყოფება მისამართზე. თუ პიროვნება არ იმყოფება ადგილზე რეაგირებას ახდენს C; გამონაკლისის სახით, P -რეაგირებას ახდენს, როდესაც არ ხდება თანხის გადახდა სამედიცინო დაწესებულებაში, ასევე შემთხვევა, როდესაც არ ხდება ქირის ან ავტოსერვისის საფასურის გადახდა, მიუხედავად იმისა მხარეები ადგილზე იმყოფებიან თუ არა.
10	არამიზნობრივი ზარი	დაბალი		C				თუ ერთი და იგივე პირი, სისტემატიურად , ანუ ნებისმიერი უწყვეტი 1 საათის განმავლობაში 3 ან მეტ არამიზნობრივ შეტყობინებას განახორციელებს საზოგადოებრივი უსაფრთხოების მართვის ცენტრი „112“-ში.
11	შეურაცხმყოფელი ზარი	მაღალი		C				საზოგადოებრივი უსაფრთხოების მართვის ცენტრი 112-ის სატელეფონო ნომრის გამოყენებით ხდება შეტყობინების მიმღები პირის შეურაცხყოფა ან/და შეურაცხმყოფელი განცხადების გაკეთება.
12	არჩევნებთან დაკავშირებით კანონმდებლობის დარღვევა	მაღალი	P	C				ნებისმიერი ინფორმაცია არჩევნებთან დაკავშირებული დარღვევების შესახებ.
13	აფეთქება	მაღალი	P	C	S		F-R	ბუნებრივი აირის, საწვავის ავზის, ჟანგბადის ბალონის, ხელყუმბარის და სხვა ასაფეთქებელი ნივთიერებების აფეთქება.
14	აქცია	მაღალი	P	C	S			ნებისმიერი გამოძახება, რომელიც უკავშირდება აქციას , მანიფესტაციას ან მიტინგს.
15	აწუხებს მოქალაქე	დაბალი	P					ერთი მოქალაქის მიერ მეორე მოქალაქის სიმშვიდის დარღვევა.
16	ბეჭდის (პლომბის/ლუქის) დაზიანება	დაბალი	P	C				სპეციალური ბეჭდების, პლომბების განზრახ ან უნებლიე დაზიანება.
17	ბრაკონიერობა	საშუალო	P	C				ინფორმაცია უნებართვო თევზჭერის/ნადირობის შესახებ
18	გარდაცვალების ფაქტის დაფიქსირება	დაბალი	P	C				შეტყობინება, გარდაცვალების ფაქტის დაფიქსირების მიზნით.	P მოინიშნება, როდესაც მოქალაქე გარდაცვლილია ქუჩაში ან საეჭვო ვითარებაში. ქუჩად ითვლება ყველა ტერიტორია გარდა ბინისა, კერძო საცხოვრებელი სახლისა და მისი ეზოსი. P არ მოინიშნება იმ შემთხვევაში, თუ სამედიცინო დაწესებულებიდან პერსონალი (ადმინისტრატორი, ექიმი, მედდა და ა.შ) გადმოცემს ინფორმაციას, სტაციონარში გარდაცვლილ პაციენტთან დაკავშირებით, სამართალდამცავი ორგანოებისთვის ცნობის მიწოდების მიზნით.
19	გარევაჭრობა	საშუალო	P					გარევაჭრობასთან დაკავშირებული გამოძახება
20	გარემოს დაცვის წესის დარღვევა	მაღალი	P	C				სამუშაოს წარმოებისას, სამშენებლო ნარჩენებით ან სხვა მასალებით გარემოს დაბინძურება/დაზიანება. წყლის ობიექტების: წყალსაცავების, ტბების, მდინარეებიის და ა.შ დაბინძურება, დანაგვიანება, დაშრეტასთან დაკავშირებით შემოსული ინფორმაცია. შეტყობინება მიმდინარე ფაქტის შესახებ უკანონო ხე-ტყის მოჭრასთან დაკავშირებით და ა.შ.
21	გზაზე მოძრაობის შეფერხება	მაღალი	P					შეტყობინება გზის სავალ ნაწილზე მოძრაობის შეფერხების შესახებ.
22	გზის და ხიდის სავალი ნაწილის დაზიანება	მაღალი	P					შეტყობინება გზის ან/და ხიდის სავალი ნაწილის ავარიული დაზიანების, ასევე ხიდის მოაჯირის გადანგრევის შესახებ.
23	დაკარგული პიროვნება	დაბალი	P	C			F-R	პიროვნებასთან დაკავშირების შეუძლებლობა, როდესაც უცნობია მისი ადგილსამყოფელი ან როდესაც პირს გზა აებნა, ან/და დაუსახლებელ პუნქტებში ადამიანის დაკარგვის ფაქტთან დაკავშირებული ინფორმაცია.	საჭიროების შემთხვევაში რეაგირებას ახდენს F-R.
24	დაკარგული სანომრე ნიშანი	დაბალი	P					ნებისმიერი სახის სატრანსპორტო საშუალების სანომრე ნიშნის დაკარგვა.
25	დარჩა/გაყვა ნივთი	დაბალი	P	C				შეტყობინება, მოქალაქის მიერ ნივთის სატრანსპორტო საშუალებაში დარჩენის შესახებ.ნივთი გაჰყვა სხვა პიროვნებას.	თუ მოქალაქემ იცის ა/მანქანის ან/და პიროვნების საიდენტიფიკაციო მონაცემები რეაგირებას ახდენს P. სხვა შემთხევებში რეაგირებს C.
26	დეზერტირობა	საშუალო	P	C				სამხედრო მოსამსახურის სამხედრო ნაწილში არ გამოცხადება ან სამხედრო ნაწილის თვითნებურად დატოვება.
27	ელექტროტრავმა	მაღალი	P	C			F-R	ელექტროენერგიის ძაბვის შედეგად მიყენებული ზიანი, დამწვრობა.	საგანგებო სიტუაციების მართვის სამსახური გადის თუ საჭიროა მაშველების ჩართვა (დაშავებული მიუდგომელ ადგილზეა);
28	თავისუფლების უკანონო აღკვეთა	მაღალი	P	C	S			ადამიანის პირადი თავისუფლების აღკვეთის ფაქტი, როდესაც მოქალაქეს ეკრძალება პირადი კონტაქტები და გადაადგილება სასურველ დროს და სასურველ სივრცეში ანდა მოქალაქის ნების საწინააღმდეგოდ მისი სადმე წაყვანა.
29	თამბაქოს/მარიხუანის მოხმარების წესების დარღვევა	დაბალი	P					შეტყობინება, თამბაქოს ნაწარმის, თამბაქოს აქსესუარების, თამბაქოს მოხმარებისთვის განკუთვნილი მოწყობილობის მოხმარების, განლაგების ან/და რეალიზაციის წესების მართლსაწინააღმდეგო დარღვევის შესახებ. ასევე მარიხუანას მოხმარების წესების დარღვევა.
30	თაღლითობა	საშუალო	P	C				სხვისი საკუთრების მოტყუებით დაუფლება, მითვისება ან გაფლანგვა
31	იარაღთან დაკავშირებული ინფორმაცია	მაღალი	P	C				ინფორმაცია უკანონოდ ცეცხლსასროლი/ცივი იარაღის, საბრძოლო მასალის, ფეთქებადი ნივთიერების, ასაფეთქებელი მოწყობილობის, მათი დამზადების, ტარება/შენახვისა და ყიდვა /გაყიდვა და გადაზიდვის შესახებ.	შეტყობინება გადაეცემა შსს ტერიტორიულ ორგანოს (C), ხოლო საპატრულო პოლიციას (P) შსს ტერიტორიულ ორგანოსთან ერთად იმ შემთხვევაში, თუ დანაშაული მიმდინარეა.
32	ითხოვს პოლიციას	დაბალი	საკონს-ულტა-ციო					შეტყობინება, როდესაც მოქალაქე ითხოვს საპატრულო პოლიციის მისვლას გამოძახების ადგილზე და არ ასახელებს გამოძახების მიზეზს.	ამ შემთხვევაში შეტყობინების ინიციატორს საზოგადოებრივი უსაფრთხოების მართვის ცენტრი „112“-ის მიერ განემარტება, რომ პოლიციის მოთხოვნის კონკრეტული მიზეზის დასახელების გარეშე პოლიცია ვერ უზრუნველყოფს შემთხვევის ადგილზე მისვლას. ინიციატორის მიერ გამოძახების მიზეზის დაკონკრეტების შემდეგ შეტყობინებას საერთო წესით მიენიჭება შესაბამისი ინციდენტის ტიპი, რომელიც გადაეცემა ამ დანართით გათვალისწინებულ უფლებამოსილ სუბიექტ(ებ)ს.
33	ინტოქსიკაცია CO	მაღალი	P	C				CO - თი გამოწვეული მოწამვლა. მაგ.: მანქანების გამონაბოლქვი, გამათბობელი სისტემების წვის პროდუქტი.
34	ისტორიის, კულტურული ან ბუნების ძეგლების ხელყოფა	საშუალო	P	C				ისტორიული ობიექტის, კულტურული ან ბუნების ძეგლის ხელყოფა ან ისეთი პირობების შექმნა, რამაც შეიძლება მათი დაზიანება გამოიწვიოს.
35	კარის ჩაკეტვით გამოწვეული საშიშროება	მაღალი	P				F-R	ნებისმიერი შემთხვევა, როდესაც ჩაკეტილ კარს მიღმა არსებობს რაიმე საშიშროება, რომელიც საფრთხეს უქმნის ჩაკეტილ სივრცეში დარჩენილ პიროვნებას. ასევე, ქმნის აფეთქების ან ხანძრის გაჩენის საშიშროებას.	საგანგებო სიტუაციების მართვის სამსახური მოქმედებს მხოლოდ პოლიციასთან ერთად, გარდა იმ შემთხვევისა, როდესაც მიღებული ინფორმაციის თანახმად, აშკარაა ადამიანის სიცოცხლის, ჯანმრთელობის ან ქონებისათვის ზიანის მიყენების უშუალო და იმწუთიერი საფრთხე, რა დროსაც საგანგებო სიტუაციების მართვის სამსახურის სამაშველო დანაყოფი რეაგირებს დაუყოვნებლივ. აღნიშნული შემთხვევის შესახებ სამაშველო დანაყოფი ატყობინებს საგანგებო სიტუაციების მართვის სამსახურის შესაბამის დანაყოფს და ინციდენტის ადგილზე რეაგირებას ახორციელებს შესაბამისი დამსწრე პირის (ოჯახის წევრის, მეზობლის, ხოლო ასეთის არ არსებობის შემთხვევაში, ნებისმიერი სხვა პირის) თანდასწრებით.
36	კიბერ დანაშაული	დაბალი		C				შეტყობინება იურიდიული ან კერძო პირის ელექტრონულ სისტემაში უნებართვო შეღწევის, გამოყენების და ხელყოფის შესახებ.
37	კომა ნარკოტიკული/ დაუზუსტებელი	მაღალი	P					უგონო მდგომარეობა, გამოწვეული ნარკოტიკული ან მსგავსი ზემოქმედების მქონე ნივთიერებით.	საპატრულო პოლიციას (P) შეტყობინება გადაეცემა იმ შემთხვევაში, თუ ფაქტი ხდება ქუჩაში. ქუჩათ ითვლება ყველა ტერიტორია, გარდა კერძო საცხოვრებელი სახლისა ან ბინისა.
38	კონფლიქტი	საშუალო	P					უთანხმოება, რომლის მოგვარება ვერ ხერხდება ჩარევის გარეშე.
39	კონფლიქტი მეზობლებს შორის	საშუალო	P	C				მეზობლების გარკვეულ საკითხზე შეუთანხმებლობა და პრობლემის მოუგვარებლობა ჩარევის გარეშე.	შსს-ს ტერიტორიულ ორგანოებს( C) შეტყობინება გადაეცემათ უბნის პასპორტის წარმოებისას და კანონმდებლობით დაკისრებული სხვა ამოცანების განსახორციელებლად.
40	კონფლიქტი/ ოჯახური ძალადობა	საშუალო	P	C				შეტყობინება, როდესაც ერთი ოჯახის წევრის მიერ ხდება ოჯახის მეორე წევრის უფლებების დარღვევა (ძალადობა, სისტემატური შეურაცხყოფა, შანტაჟი ან დამცირება). ოჯახის წევრად ითვლება: დედა, მამა, პაპა, ბებია, მეუღლე, შვილი (გერი), ნაშვილები, მინდობით აღსაზრდელი, მშვილებელი, მშვილებლის მეუღლე, მინდობით აღმზრდელი (დედობილი, მამობილი), შვილიშვილი, და, ძმა, მეუღლის მშობელი, სიძე, რძალი, ყოფილი მეუღლე, არარეგისტრირებულ ქორწინებაში მყოფი პირი და მისი ოჯახის წევრი, მეურვე, მზრუნველი, მხარდამჭერი, აგრეთვე ნებისმიერი სხვა პირები, რომლებიც მუდმივად ეწევიან ან ეწეოდნენ ერთიან საოჯახო მეურნეობას.	ინციდენტის ტიპი ენიჭება შემთხვევას, თუ ინიციატორისაგან მიღებული ინფორმაციით ძალადობის შედეგი არ არის ცემაზე მძიმე. საპატრულო პოლიციას (p) შეტყობინება გადაეცემა მხოლოდ მაშინ, თუ ინიციატორი თანხმობას აცხადებს საპატრულო პოლიციის ეკიპაჟთან შეხვედრაზე და ითხოვს პოლიციის გადაუდებელ დახმარებას. სხვა შემთხვევაში შეტყობინება გადაეცემათ მხოლოდ შსს-ს ტერიტორიულ ორგანოებს (C).
41	მიტოვებული მანქანა	დაბალი	P	C				ინფორმაცია მიტოვებული ა/მანქანის შესახებ, რომლის მფლობელის ვინაობაც არ არის ცნობილი.
42	მიცვალებულისადმი უპატივცემულობა	დაბალი	P	C				მიცვალებულის ან საფლავის შეურაცხყოფის/დაზიანების ფაქტი.
43	მკვლელობა	მაღალი	P	C	S			ნებისმიერი შეტყობინება, რომელიც დაკავშირებულია ადამიანის სიცოცხლის ხელყოფასთან.
44	მუქარა	მაღალი	P	C				სიცოცხლის მოსპობის, ჯანმრთელობის დაზიანების, ქონების განადგურების მუქარა, რა საშუალებითაც არ უნდა ხორციელდებოდეს იგი.	თუ ორივე მხარე ადგილზეა რეაგირებას ახდენს p-ს, დანარჩენ შემთხვევაში რეაგირებას ახდენს მხოლოდ C.
45	მძევლად აყვანა	მაღალი	P	C	S			ადამიანის ან ადამიანთა ჯგუფის ძალადობით დაკავება, თავისუფლების აღკვეთა რაიმე მოთხოვნის სანაცვლოდ. მაგ.: მძევლად აყვანა ვინმეს პატიმრობიდან გათავისუფლების სანაცვლოდ, გამოსასყიდის მიღების მიზნით.
46	ნაპოვნი ნივთები	დაბალი	P	C				შეტყობინება ნაპოვნ ნივთზე, რომელიც არ იწვევს ეჭვს და არ არის საბრძოლო მასალა.
47	ნაპოვნი საბრძოლო მასალა	მაღალი	P	C				შეტყობინება ნებისმიერი ნაპოვნი საბრძოლო მასალის: ფეთქებადი ნივთიერების, ასაფეთქებელი მოწყობილობის, ხელყუმბარის, იარაღის, ტყვიების და ა. შ.(გარდა ცივი იარაღისა) შესახებ.
48	ნაპოვნი სანომრე ნიშანი	დაბალი	P					შეტყობინება სანომრე ნიშნის პოვნის შესახებ
49	ნარკოტიკთან დაკავშირებული ინფორმაცია	მაღალი	P	C				შეტყობინება ნარკოტიკის შენახვის, მოხმარების, ყიდვა/გაყიდვის შესახებ ან ინფორმაცია ნარკოტიკების მომხმარებელთან დაკავშირებით.	შეტყობინება გადაეცემა შსს ტერიტორიულ ორგანოს (C), ხოლო საპატრულო პოლიციას (P) შსს ტერიტორიულ ორგანოსთან ერთად იმ შემთხვევაში, თუ დანაშაული მიმდინარეა.
50	ნივთის ან ქონების დაზიანება	საშუალო	P	C				შეტყობინება კერძო ან იურიდიული პირის კუთვნილი ნივთის ან ქონების დაზიანებასთან დაკავშირებით.	თუ მხარეები ადგილზე არიან რეაგირებას ახდენს P, სხვა შემთხვევებში რეაგირებს C.
51	ნივთის დაკარგვა გაურკვეველ ვითარებაში	დაბალი		C				შეტყობინება, როდესაც ინიციატორი ვერ აკონკრეტებს ნივთი მოპარეს თუ დაკარგა.
52	ოკუპირებულ ტერიტორიაზე შესვლის წესების დარღვევა	საშუალო	P					ოკუპირებული ტერიტორიიდან საქართველოს საზღვრის უკანონოდ კვეთა.
53	ოპერატიული ინფორმაცია	მაღალი	P	C	S			ინფორმაცია ტერიტორიის დანაღმვის ან/და ტერორისტული დანაშაულებების შესახებ. აგრეთვე ინფორმაცია სხვა ნებისმიერი დანაშაულის მომზადების ან ჩადენილ დანაშაულთან დაკავშირებული პირების/გარემოებების შესახებ.	ტერიტორიის დანაღმვის და ტერორისტულ დანაშაულებებთან დაკავშირებული ინფორმაციის შესახებ საზოგადოებრივი უსაფრთხოების მართვის ცენტრი „112“-ის მიერ შეტყობინების მიღების შემდეგ, ოპერატორი ქმნის შესაბამის საქმეს და ჩვეულებრივი წესით რეაგირების მიზნით გადასცემს შსს საპატრულო პოლიციას/სამინისტროს ტერიტორიულ ორგანოებს. ამავე დროს ინფორმაციას აწვდის საქართველოს სახელმწიფო უსაფრთხოების სამსახურის კონტრტერორისტულ ცენტრს (დეპარტამენტი). ტერიტორიის დანაღმვის და ტერორისტულ დანაშაულებებთან დაკავშირებული ინფორმაციის მიღებაზე უფლებამოსილმა თითოეულმა სუბიექტმა რეაგირება უნდა განახორციელოს საქართველოს სახელმწიფო უსაფრთხოების სამსახურის კონტრტერორისტულ ცენტრთან (დეპარტამენტი) შეთანხმებით. ინფორმაცია სხვა ნებისმიერი დანაშაულის მომზადების ან ჩადენილ დანაშაულთან დაკავშირებული პირების/გარემოებების შესახებ გადაეცემა მხოლოდ შსს საპატრულო პოლიციას/სამინისტროს ტერიტორიულ ორგანოებს.
54	სახელმწიფო საიდუმლოების ხელყოფა	მაღალი	P	C	S			ინფორმაცია სახელმწიფო საიდუმლოების ხელყოფის შესახებ	საზოგადოებრივი უსაფრთხოების მართვის ცენტრი „112“-ის მიერ შეტყობინების მიღების შემდეგ, საზოგადოებრივი უსაფრთხოების მართვის ცენტრი „112“-ის ოპერატორი ქმნის შესაბამის საქმეს და ჩვეულებრივი წესით გადასცემს მას შსს საპატრულო პოლიციას/სამინისტროს ტერიტორიულ ორგანოებს. ასევე, საზოგადოებრივი უსაფრთხოების მართვის ცენტრი „112“ უშუალოდ უკავშირდება საქართველოს სახელმწიფო უსაფრთხოების სამსახურის ადმინისტრაციის სამორიგეო დანაყოფს და აწვდის შესაბამის ინფორმაციას.
55	პარკირების პრობლემა გარდა საგზაო ნიშნის მოქმედების ზონისა და სავალი ნაწილის ჩაკეტვისა.	საშუალო	P					ინფორმაცია ჩახერგილი ან არასწორად გაჩერებული/პარკირებული მანქანის შესახებ.	საპატრულო პოლიციას (p) შეტყობინება გადაეცემა მხოლოდ საგზაო ნიშნის მოქმედების ზონაში მდგომ სატრანსპორტო საშუალებებთან დაკავშირებით.
56	პიროვნება არ გამოდის კონტაქტზე	მაღალი	P	C			F-R	პიროვნება არ ეხმაურება ახლობელს/ნაცნობს, არსებობს საფუძვლიანი ეჭვი, რომ იგი არის სახლში ან ნებისმიერ ჩაკეტილ სივრცეში და რაიმე ფაქტორი უშლის ხელს კონტაქტზე გამოსვლაში (მაგ.: თავს ცუდად გრძნობს).	საგანგებო სიტუაციების მართვის სამსახური მოქმედებს მხოლოდ პოლიციასთან ერთად, გარდა იმ შემთხვევისა, როდესაც აშკარაა ადამიანის სიცოცხლისა და ჯანმრთელობისათვის ზიანის მიყენების უშუალო და იმწუთიერი საფრთხე, რა დროსაც საგანგებო სიტუაციების მართვის სამსახურის სამაშველო დანაყოფი რეაგირებს დაუყოვნებლივ. აღნიშნული შემთხვევის შესახებ სამაშველო დანაყოფი ატყობინებს საგანგებო სიტუაციების მართვის სამსახურის შესაბამის დანაყოფს და ინციდენტის ადგილზე რეაგირებას ახორციელებს შესაბამისი დამსწრე პირის (ოჯახის წევრის, მეზობლის, ხოლო ასეთის არ არსებობის შემთხვევაში, ნებისმიერი სხვა პირის) თანდასწრებით.
57	პიროვნების იდენტიფიცირება	დაბალი	P					შეტყობინება, როდესაც ინიციატორი ითხოვს საპატრულო ეკიპაჟს პიროვნების იდენტიფიცირების/ დადგენის მიზნით.	საპატრულო პოლიციას (p) შეტყობინება არ გადაეცემა, თუ პიროვნების იდენტიფიცირება მოითხოვება: ა) ტრანსპორტის კონტროლის სამსახურის წარმომადგენელთან (კონტროლიორი) დაკავშირებული შემთხვევებისას;
58	პრევენცია	საშუალო	P					შეტყობინება, როდესაც საჭიროა წინასწარი ღონისძიებები რაიმე არასასურველი მოვლენის თავიდან ასაცილებლად.
59	პრეტენზია ჯარიმასთან დაკავშირებით	საშუალო	P					პრეტენზია, რომელსაც აფიქსირებს მოქალაქე შინაგან საქმეთა სამინისტროს თანამშრომლის მიერ გამოწერილ ჯარიმასთან დაკავშირებით და ითხოვს ადგილზე სხვა ეკიაპჟს ან ოცმეთაურს.
60	პრეტენზია პოლიციასთან	მაღალი				შსს		ნებისმიერი პრეტენზია, რომელსაც აფიქსირებს მოქალაქე შსს თანამშრომლის მიმართ.
61	პრეტენზია პოლიციასთან - ოცმეთაურის გასვლით	მაღალი	P			შსს		ნებისმიერი პრეტენზია, რომელსაც აფიქსირებს მოქალაქე შსს თანამშრომლის მიმართ და ითხოვს საპატრულო პოლიციის ეკიპაჟის მისვლას.	ამ ინციდენტზე ეკიპაჟის გასვლა/არ გასვლასთან დაკავშირებით გადაწყვეტილებას იღებს საპატრულო პოლიციის (p) პასუხისმგებელი პირი (ოცმეთაური ან ათმეთაური).
62	პრეტენზია საპატრულო პოლიციასთან	მაღალი	P					ინციდენტის ტიპი მიენიჭება იმ შემთხვევაში, თუ მოქალაქე აფიქსირებს უკმაყოფილებას საპატრულო პოლიციის თანამშრომლის მიერ სამსახურებრივი მოვალეობის შესრულების დროს განხორციელებული რაიმე ქმედების (მოვალეობის არაჯეროვანი შესრულების), ან უმოქმედობის შესახებ. მათ შორის: საპატრულო ეკიპაჟის დაგვიანების, არაკომპეტენტურობის,საცობის დროს პოლიციის უმოქმედობის ან საპატრულო პოლიციის მიერ გადაყვანილი/ გადაადგილებული ავტოსატრანსპორტო საშუალების შესახებ.
63	პროსტიტუციასთან დაკავშირებული ინფორმაცია	საშუალო	P	C				ინფორმაცია დაკავშირებული სხეულით ვაჭრობის, მოქალაქის იძულებით პროსტიტუციაში ჩაბმის ან პროსტიტუციისათვის ფართის გადაცემის შესახებ.
64	ჟურნალისტისათვის პროფესიულ საქმიანობაში უკანონოდ ხელის შეშლა	საშუალო	P	C				ჟურნალისტის იძულება გაავრცელოს ან თავი შეიკავოს ინფორმაციის გავრცელებისგან.
65	რალი	მაღალი	P					ინფორმაცია სატრანსპორტო საშუალებებით რბოლის შესახებ.
66	რელიგიურ ნიადაგზე წარმოშობილი უთანხმოება	საშუალო	P	C				რელიგიური წესის აღსრულებისათვის უკანონო ხელშეშლა, ასევე ადამიანის უფლებების დარღვევა რელიგიის/რწმენის გამოხატვის ან სხვა შეხედულებების გამო.
67	საგზაო/სარემონტო სამუშაოები	დაბალი	P					შეტყობინება, როდესაც შესაბამისი სამსახური ითხოვს ეკიპაჟს ავარიული საგზაო ან/და სარემონტო სამუშაოების დაუყოვნებლივი წარმოებისათვის ან სამუშაოების ხელშემშლელი პირობების აღმოფხვრის მიზნით.
68	უკანონო საექიმო ან ფარმაცევტული საქმიანობა	დაბალი	P	C				ულიცენზიო საექიმო, ფარმაცევტული საქმიანობა, კუსტარულად პრეპარატის დამზადება, ფსიქოტროპული პრეპარატის რეცეპტის გარეშე გაყიდვა.	შეტყობინება გადაეცემა შსს ტერიტორიულ ორგანოს (C), ხოლო საპატრულო პოლიციას (P) შსს ტერიტორიულ ორგანოსთან ერთად იმ შემთხვევაში, თუ დანაშაული მიმდინარეა.
69	საეჭვო ნივთი	მაღალი	P	C	S			შეტყობინება უმეთვალყურეოდ დატოვებული ნებისმიერი ნივთის შესახებ. როდესაც ინიციატორი ვერ აზუსტებს, თუ რა ნივთია ანდა ნივთი ეჩვენება საეჭვოდ.
70	საზოგადოებრივი წესრიგის დარღვევა/ხულიგნობა	მაღალი	P	C	S			შეტყობინება, როდესაც ადამიანი ან ადამიანთა ჯგუფი, პროტესტის გამოსახატად ახორციელებს თანამოაზრეთა შეკრებას ტრანსპოტის მოძრაობის შეფერხების, საწარმოს მუშაობის ბლოკირების და სხვა მიზნით. ასევე, ადამიანის ღირსებისა და საზოგადოების ზნეობის შეურაცხმყოფელი ქმედების განხორციელება: ყვირილით, გინებთ, დაცინვით, საზოგადოებრივი ან კერძო ქონების დაზიანებით, შუშების მტვრევით ან ფიზიკური ზემოქმედებით. საზოგადოებრივი თავშეყრის ადგილებში ალკოჰოლური სასმელების მიღება.
71	პირადი/ოჯახური საიდუმლოს ხელყოფა	დაბალი		C				მოქალაქის პირადი ან ოჯახის წევრთა ურთიერთობის: მიმოწერის, სატელეფონო საუბრების და ა.შ. უკანონოდ მოპოვება/გავრცელება/ გამოყენება.
72	ჭის ლუქია ახდილი	დაბალი	P					ინფორმაცია ახდილი ჭის ლუქის შესახებ
73	სამორინეში სათამაშოდ დაშვება 21 წლამდე	დაბალი	P	C				ინფორმაცია 21 წლამდე მოქალაქის სამორინეებსა და მსგავს დაწესებულებებში შეშვების შესახებ.
74	სამსახურებრივი უფლებამოსილების ბოროტად გამოყენება/გადამეტება	საშუალო	P	C				შეტყობინება, უფლებამოსილი პირის მიერ, კანონით გათვალისწინებული სამსახურებრივი უფლებამოსილების გადამეტების ან ბოროტად გამოყენების შესახებ.
75	სანიტარიულ-ეპიდემიოლოგიური წესის დარღვევა ან ფალსიფიკაცია	საშუალო	P					პიროვნების ან ორგანიზაციის მხრიდან სანიტარიულ–ეპიდემიოლოგიური წესების დარღვევა, რამაც შესაძლოა მოწამვლა გამოიწვიოს. მაგ: დაბინძურებული წყლით საკვების მომზადება/გაყიდვა. მწარმოებლის ან გამსაღებლის მიერ მოგების მიღების მიზნით, პროდუქციის, სასმელის ან საკვების შემადგენლობის შეცვლა. ფალსიფიცირებული პროდუქციით ადამიანის ჯანმრთელობისა და სიცოცხლისათვის საფრთხის შექმნა.ასევე ვადაგასული პროდუქციის გაყიდვა.
76	სასამართლო გადაწყვეტილების შეუსრულებლობა	დაბალი	P	C				სასამართლოს მიერ მიღებული გადაწყვეტილების, განჩინების, დადგენილების შეგნებულად შეუსრულებლობა ან მისი შესრულებისთვის ხელის შეშლა, ასევე დამცავი/შემაკავებელი ორდერის პირობების დარღვევა	საპატრულო პოლიციის (p) შეტყობინება გადაეცემა მხოლოდ იმ შემთხვევაში, თუ მიღებული შეტყობინება უკავშირდება დამცავი ან შემაკავებელი ორდერის პირობების დარღვევას.
77	სატრანსპორტო საშუალების მართვა არაფხიზელ მდგომარეობაში	მაღალი	P					ინფორმაცია, ნარკოტიკული, ფსიქოტროპული ან ალკოჰოლური ზემოქმედების ქვეშ მყოფი მოქალაქის მიერ სატრანსპორტო საშუალების მართვის შესახებ.
78	სატრანსპორტო საშუალების მართვა უფლების გარეშე	დაბალი	P					მოქალაქის მიერ სატრანსპორტო საშუალების მართვა, მართვის უფლების არქონის შემთხვევაში.
79	საქართველოს საზღვრის უკანონო კვეთა	მაღალი	P		S			საქართველოს საზღვრის კვეთა დადგენილი წესების დარღვევით, უკანონოდ.
80	საქართველოს სახელმწიფო სიმბოლოების შებღალვა	მაღალი	P	C				საქართველოს გერბის ან/და დროშის შებღალვა/დამცირება/ დაზიანება.
81	საწარმოო ტრავმა	მაღალი		C				შეტყობინება სამსახურებრივი მოვალეობის შესრულების დროს მიღებული სხეულის ფიზიკური დაზიანების შესახებ.
82	სექსუალური ხასიათის დანაშაული	მაღალი	P	C				სექსუალური ძალადობის ხასიათის მატარებელი ნებისმიერი ქმედება. (იგულისხმება ძალადობრივი სექსუალური შეღწევა(გაუპატიურება) ნებისმიერი ასაკის პირის მიმართ, ასევე სექსუალური ხასიათის ნებისმიერი სხვაგვარი ქმედება ჩადენილი ძალადობით ან ძალადობის მუქარით.
83	სიმაღლიდან ვარდნა/ ჩავარდნა	მაღალი	P	C			F-R	2 მეტრი და მეტი სიმაღლიდან ვარდნის ყველა ის შემთხვევა, რომელიც საჭიროებს პოლიციის ჩართულობას.	საგანგებო სიტუაციების მართვის სამსახური მოქმედებს მხოლოდ მაშინ, როცა დაზარალებული იმყოფება მიუდგომელ ადგილზე (სახურავი, ხევი, აივანი...)
84	სიტყვის თავისუფლების ხელყოფა	საშუალო	P	C				შეტყობინება სიტყვის თავისუფლების შეზღუდვის შესახებ.
85	სოს	მაღალი	P					ნებისმიერი შემთხვევა, როდესაც მოქალაქე ითხოვს შველას, ცნობილია მისამართი, გაურკვეველია პრობლემა.
86	სტიქიური უბედურება	მაღალი	P	C	S		F-R	ზვავი, ქვის ცვენა, გრიგალი, ნამქერი, წყალდიდობა, მეწყერი და ა.შ.
87	სუიციდი	მაღალი	P	C			F-R	ინფორმაცია თვითმკვლელობის შესახებ.	საჭიროების შემთხვევაში რეაგირებას ახდენს F-R
88	სუიციდის მცდელობა	მაღალი	P	C			F-R	ინფორმაცია თვითმკვლელობის მცდელობის შესახებ.
89	ტერორისტული აქტი	მაღალი	P	C	S		F-R	მოსახლეობის დაშინების და ხელისუფლებაზე ზემოქმედების მიზნით მომხდარი აფეთქება, ცეცხლის წაკიდება, ადამიანზე თავდასხმა, იარაღის გამოყენება ან სხვა ქმედება, რომელიც ქმნის ადამიანის სიცოცხლის მოსპობის, მნიშვნელოვანი ქონებრივი ზიანის ან სხვა მძიმე შედეგის განხორციელების საშიშროებას.	შეტყობინება გადაეცემა სახელმწიფო უსაფრთხოების სამსახურს
90	უბედური შემთხვევა	მაღალი	P	C			F-R	შემთხვევა, რომელსაც მოჰყვა ადამიანის ჯანმრთელობის დაზიანება ან სიცოცხლის მოსპობა, ქონების დაზიანება, შენობა-ნაგებობის ნგრევა, ჩამოშლა და ა.შ
91	უბედური შემთხვევის საფრთხე	მაღალი	P				F-R	შეტყობინება უბედური შემთხვევის საშიშროებასთან დაკავშირებით.
92	უგონო	მაღალი	P					მდგომარეობა, როცა პიროვნება კონტაქტში არ შემოდის, არ რეაგირებს. აგრეთვე უგონო მდგომარეობა, რომელიც უკავშირდება შაქრიან დიაბეტს.	საპატრულო პოლიციას (p) შეტყობინება გადაეცემა იმ შემთხვევაში, თუ ინციდენტი უკავშირდება ქუჩაში არსებულ შემთხვევას. ქუჩად ითვლება ყველა ტერიტორია, გარდა კერძო საცხოვრებელი სახლისა ან ბინისა.
93	უსახლკაროებთან დაკავშირებული პრობლემა	დაბალი	P					უსახლკაროებთან დაკავშირებული ნებისმიერი საქმის შემთხვევა.
94	ფაქტის დაფიქსირება	დაბალი	P					შეტყობინება, როდესაც მოქალაქეს ესაჭიროება რაიმე ფაქტის ოქმით დაფიქსირება შემდგომ სასამართლოში, სადაზღვევოში ან რაიმე სხვა უწყებაში წარსადგენად.
95	ფსიქიკური აშლილობა	მაღალი	P					ფსიქიკურ აშლილობასთან დაკავშირებული შეტყობინება, როდესაც პაციენტი საფრთხეს უქმნის თავის თავს, გარშემო მყოფებს, აგრესიულია ან საჭიროებს გადაყვანას სპეციალურ დაწესებულებაში.	საპატრულო პოლიციას (p) შეტყობინება გადაეცემა იმ შემთხვევაში,როდესაც ინიციატორი ან ადგილზე მისული სასწრაფო-სამედიცინო დახმარების ბრიგადის ექიმი გადმოსცემს ინფორმაციას პაციენტის აგრესიულობის შესახებ.
96	ქრთამის აღება/მიცემა	საშუალო	P	C				შეტყობინება ან ინფორმაცია ქრთამის გაცემა-აღების ფაქტთან დაკავშირებით.	შეტყობინება გადაეცემა შსს ტერიტორიულ ორგანოს (C), ხოლო საპატრულო პოლიციას (P) შსს ტერიტორიულ ორგანოსთან ერთად იმ შემთხვევაში, თუ დანაშაული მიმდინარეა.
97	ქურდობა	მაღალი	P	C				სხვისი ნივთის ფარულად დაუფლება მართლსაწინააღმდეგო მისაკუთრების მიზნით. აგრეთვე, შეტყობინება ქურდობის მცდელობის შესახებ.	შეტყობინება გადაეცემა შსს ტერიტორიულ ორგანოს (C), ხოლო საპატრულო პოლიციას (P) შსს ტერიტორიულ ორგანოსთან ერთად იმ შემთხვევაში, თუ დანაშაული მიმდინარეა.
98	ყალბი ფულის ან ფასიანი ქაღალდის დამზადება ან გასაღება	მაღალი	P	C				ნებისმიერი ინფორმაცია, დაკავშირებული ყალბი ფულის, ფასიანი ქაღალდების და ნებისმიერი სხვა დოკუმენტაციის, თანხის შემცვლელი ტალონების (მაგ: საწვავის ტალონი) დამზადება/გასაღებასთან.	შეტყობინება გადაეცემა შსს ტერიტორიულ ორგანოს (C), ხოლო საპატრულო პოლიციას (P) შსს ტერიტორიულ ორგანოსთან ერთად იმ შემთხვევაში, თუ დანაშაული მიმდინარეა.
99	ყაჩაღობა	მაღალი	P	C	S			თავდასხმა სხვისი ქონების მისაკუთრების მიზნით, ჩადენილი სიცოცხლისათვის ან ჯანმრთელობისათვის საშიში ძალადობით ან და ასეთი ძალადობის გამოყენების მუქარით
100	შეჭრა	მაღალი	P	C				სხვის კუთვნილ ან სადავო ფართში მოქალაქეთა არაკანონიერი შეჭრა ნებისმიერი მიზნით.
101	ჩხუბი	მაღალი	P	C				ჩხუბთან დაკავშირებით შემოსული ნებისმიერი შეტყობინება, რომელსაც ჯერ არ მოყოლია ადამიანის ჯანმრთელობის დაზიანება.
102	ცეცხლსასროლი იარაღიდან სროლა	მაღალი	P	C				ინფორმაცია ნებისმიერი ცეცხლსასროლი იარაღიდან გასროლის შესახებ, აღნიშნული ინციდენტის ტიპში მოიაზრება სპეცოპერაციასთან დაკავშირებული სროლებიც.
103	ცრუ გამოძახება	მაღალი	P					საზოგადოებრივი უსაფრთხოების მართვის ცენტრი „112“-ის გამოყენება გადაუდებელი დახმარების მოთხოვნის მიზნით ცრუ შეტყობინების განსახორციელებლად, რასაც შედეგად მოჰყვა შემთხვევის ადგილზე შესაბამისი საგანგებო (ექსტრემალური) სამსახურის გასვლა (ტერორიზმის შესახებ ცრუ შეტყობინება არ მოიაზრება).
104	ძალადობა	მაღალი	P	C				ნებისმიერი სიტყვიერი შეურაცხყოფა, ფიზიკური ან სხვაგვარი ძალადობა, რამაც დაზარალებულის ფიზიკური ტკივილი ან/და ფსიქიკური ტანჯვა გამოიწვია, რასაც არ მოჰყოლია ადამიანის ჯანმრთელობის გაუარესება. (არ საჭიროებს სამედიცინო დახმარებას). აგრეთვე, შეტყობინება არასრულწლოვნის მათხოვრობის ფაქტთან დაკავშირებით.
105	ძარცვა	მაღალი	P	C	S			შეტყობინება სხვისი მოძრავი ნივთის აშკარა დაუფლების შესახებ, მართლსაწინააღმდეგო მისაკუთრების მიზნით. მისაკუთრება შეიძლება მოხდეს ძალადობით, რომელიც საშიში არ არის სიცოცხლისათვის ან ჯანმრთელობისათვის, ანდა ასეთი ძალადობის მუქარით.
106	ძებნილი სატრანსპორტო საშუალება	მაღალი	P					შეტყობინება ძებნილი სატრანსპორტო საშულების ადგილმდებარეობის შესახებ.
107	წყალში გადახტომას აპირებს	მაღალი	P				F-R	ინფორმაცია მოქალაქის წყალში გადახტომის მცდელობის შესახებ.
108	წყალშია მოქალაქე	მაღალი	P				F-R	ინფორმაცია წყალში გადამხტარი, ჩავარდნილი ადამიანის ან გვამის შესახებ.
109	ხანძარი	მაღალი	p	C	S		F-R	შეტყობინება ხანძრის შესახებ.
110	ჯანმრთელობის დაზიანება	მაღალი	p	C				სხეულის დაზიანება, რომელიც სახიფათოა ჯანმრთელობისთვის, გამოწვეულია რაიმე ქმედებით (მაგ: ცემით, ბლაგვი იარაღის ჩარტყმით, ცივი ან ცეცხლსასროლი იარაღის გამოყენებით), ასევე ჯანმრთელობისთვის/სიცოცხლისთვის საშიში სხვა საშუალებით (მაგ: მჟავის შესხმით).
111	სარდაფიდან ან ბინიდან წყლის ამოტუმბვა	საშუალო					F-R	შეტყობინება, როდესაც ესაჭიროებათ სახანძრო-სამაშველო სამსახური დატბორილი შენობა-ნაგებობიდან წყლის ამოსატუმბად.
112	მოქალაქე - ლიფტში	მაღალი					F-R	შეტყობინება მოქალაქის ლიფტში ჩაკეტვის შესახებ.
113	არასაგანგებო საქმე სამაშველო ბრიგადის გასვლით	დაბალი	P	C			F-R	ყველა არასაგანგებო შემთხვევა, რომელიც მოითხოვს სამაშველო ბრიგადის ჩართულობას, მათ შორის ტალახში, თოვლში, ქვიშაში ჩავარდნილი ავტომანქანა.	მხოლოდ იმ შემთხვევაში, როდესაც საფრთხე ემუქრება ადამიანის სიცოცხლეს, ჯანმრთელობას ან ქონებას. სხვა შემთხვევაში სამაშველო არ გადის . P ან C რეაგირებას ახდენს საგანგებო სიტვაციების მართვის სამსახურის შესაბამის ბრიგადასთან ერთად.
114	კარის ჩაკეტვა	საშუალო	P	C			F-R	სამაშველო სამსახურის გამოძახება ჩაკეტილი კარის გაღების მიზნით.	P ან C ტერიტორიულობის პრინციპით რეაგირებას ახდენს მხოლოდ სამაშველო სამსახურის მოთხოვნის საფუძველზე. საზოგადოებრივი უსაფრთხოების მართვის ცენტრი 112-ის ოპერატორის მიერ ინიციატორი გაფრთხილებული უნდა იყოს კარის შესაძლო დაზიანებაზე.

2. 07/11/2025 - საქართველოს მინისტრის ბრძანება - 110 - ვებგვერდი, 07/11/2025 1. 10/11/2023 - საქართველოს მინისტრის ბრძანება - 87 - ვებგვერდი, 13/11/2023